03年港姐冠軍曹敏莉(Mandy)喺2010年嫁坐擁半億身家嘅圈外男友張家傑(Jacky)，婚後生咗兩子一女，專心相夫教子。反而妹妹曹敏寶(Abo)一直喺娛樂圈載浮載沉，日前敏寶喺fb宣佈與圈外男友訂婚，並計劃4月拉埋天窗，真係恭喜晒！
曹敏寶噚日接受《蘋果》電話訪問，佢透露未婚夫叫Albert Lam，係一名科學家，佢笑晒口話﹕「Albert之前喺港大教書，近年創立自己公司搞科研，即係人工智能嗰啲嘢。」敏寶直言兩人拍拖未夠一年就計劃結婚，問到未來老公有乜好？佢話﹕「優點同缺點都係比較專注同文靜，細個會覺得悶，但o依家就覺得好好，想組織家庭就要搵穩重啲，時間好重要，現在大家想法都一致。」
即將32歲嘅敏寶直言婚後會不設房，佢笑笑口話﹕「有仔趁嫩生嘛，而且我都唔細，佢(Albert)我o依家就生添，但我唔濟，阿媽同家姐陀BB都會勁嘔，媽咪都叫我唔好搞，費事嘔住結婚。(媽咪最開心你嫁？)婆婆開心啲，我係孻女，原本都擔心我做老姑婆。」問到婚後會否退出娛樂圈？佢話﹕「當然唔會啦，同埋呢行都冇話退唔退出，工作都係要睇緣份。」
