任達華、黎瑞恩、吳啟華同林漪娸等，今日喺清水灣出席「仁濟慈善高爾夫球賽」，華哥自爆同林漪娸相識30幾年，漪娸仲爆當年喺英國返港後入娛樂圈做新人，華哥同佢合作拍劇時仲教佢講粗口，華哥笑話：「當時我哋拍《荊途》，我乜嘢初吻都畀晒佢，每次見返啲舊朋友好開心，新一年除咗希望世界和平，大家要更關心家人、關心香港社區同老人家，我今日都將配音時間改期，希望做藝人嘅要keep住向世界貢獻。」
華哥啱啱一家三口去完芬蘭旅行，佢開心話：「一個男仔喺冰天雪地，未試過10幾日喺零下20幾度不停出汗，10幾個鐘不停推行李、影相。」提到舊年係同琦琦結婚20周年，華哥就話同太太日日新鮮，最近仲上網自學課程，學習唔同思考方式，令到拍戲同待人都有改進，咁對夫妻關係呢？華哥話：「之前已經好好，但係自己有更多進步空間。」
另外，有指前無綫監製鄧特希有意以《壹號皇庭》原班人馬開拍一部律政劇，吳啟華就話好期待合作，佢話：「期待咗好耐，等到頸都長，佢(鄧特希)舊年已經同我講有好幾個題材，不過未正式開到，佢係追求完美嘅。我覺得有心就會做到，大家都唔係忙得咁緊要。」
 攝影：陳慧安 |  左起吳啟華、林漪娸、黎瑞恩、任達華 |  華哥自爆同林漪娸相識30幾年，二人一見如故。 |
 吳啟華好期待《壹號皇庭》原班人馬再合作。 |
