「心晴跑·跑傳情」慈善跑，今日喺大尾篤船灣淡水湖主壩舉行，BabyJohn(蔡瀚億)創擔任愛心大使，心晴行動信託人兼創辦人林建明，主持起步禮。
林建明指天氣就似情緒問題一樣，佢話：「過去幾年我哋慈善跑都遇上唔好嘅天氣，等於困難遇上挑戰，但係大家要記住，壞嘅天氣會過，之後會有晴天，大家要注意天氣轉變會影響人嘅情緒，特別係老人同病患者等，我哋要多啲關心佢哋，佢哋亦唔好做傻事，家人同朋友應該多啲關心。」林建明表示，希望來年會彈性處理舉行活動時間，可能提早十二月舉行，避開唔好嘅天氣，而每年都穩定籌得接近一百萬善款。
大姐Ming過去多次唔小心跌倒，幾個月前曾經跌傷手腳，早排又跌親右邊面近顴骨位置，大姐Ming話：「o依家係被毀容，傷口好番但係有疤痕唔退，過多幾個月睇下點，睇下需唔需要做醫學美容。」
BabyJohn連續第二年參與活動，佢話：「上次都係落雨，而今年自己就唔會跑，因為由11月開始病，有感冒、腸胃炎、傷風，不過唔係因為工作，而係出席各大小party，可能唔夠休息。」BabyJohn統計去年接拍近七八電影，佢話：「好多朋友見到報道，話部部戲都票房過千萬，啲人以為我搵過千萬，不過自己多工作都開心，希望keep住。」
 「心晴跑·跑傳情」慈善跑今日舉行，BabyJohn、心晴行動信託人兼創辦人林建明主持起步禮。 |  大姐Ming過去多次唔小心跌倒，幾個月前曾經跌傷手腳，早排又跌親右邊面近顴骨位置。 |  BabyJohn連續第二年參與活動。 |
 |
