人妻陳敏之近日喺大台劇《溏心風暴3》做第三者介入唐文龍同胡琳嘅婚姻，仲同唐文龍上演連場情慾戲而引起話題。今次係敏之入行以嚟最激同最搏一次，仲有份提名台慶頒獎禮最佳女配角獎。亦多得劇集帶挈，敏之工作量大增，日前《蘋果》記者發現佢喺山頂同一班小朋友一齊拍外景，當日氣溫雖然好凍，但敏之竟然着住白色背心加短褲一身夏裝造型出現，真係睇見都凍，未埋位前敏之着住羽絨同披大頸巾，經一輪熱身之後就豁出去除外套拍攝，同小朋友追逐玩遊戲 ，已為人母嘅佢仲o氹得班小朋友好開心㖭！
原來當日敏之係拍一個防蚊噴霧廣告，所以造型「好清爽」，但原來佢最擔心嘅唔係自己夠唔夠暖，佢話：「當日好凍，身上貼咗5個暖包，最擔心小朋友凍親，所以叫工作人員一定要搭個帳篷俾佢哋，小朋友得3、4歲，可能自己又做咗媽咪，所以特別關注。」
敏之前年一索得男雷子樂，雖然佢未真正試過同囝囝母子檔演出搵錢，但已經好多廣告商睇中雷子樂，難怪敏之好肯定話自己受到阿仔帶挈：「其實啲人搵佢多過搵我，係阿仔帶挈我，但要睇啱唔啱，我好歡迎，只係驚阿仔會失控，勁喊。如果真係一齊拍廣告可以留念，將來睇番。」敏之話阿仔開始喺電視上認得媽咪，仲笑囝囝成日天然呆咁望住電視機，有次阿仔仲因為睇電視時見到敏之演出，即時嗌咗聲媽，令敏之冧到爆，覺得好sweet。
敏之喺《溏心3》演第三者，有唔少朋友讚佢演得唔錯，比以前演技大有進步，敏之透露：「感覺好開心，因為做咁多年戲，批評讚美都有好多，亦有人話我做戲唔好，當然會好氣餒，今次黃以愛角色，從未收過咁多留言短訊等，自己睇番意見，啲人真心睇，講得出哂劇情，好多讚美鼓勵說話，一世人未試過收咁多，幫我重新話俾觀眾聽，我有努力令大家改觀，呢個認同比獎項更開心。」
嚟緊爭女配角獎，敏之恨攞獎恨到出口：「喺劇集下好多苦功，當時坐完月即刻拍，又要拍落水同情緒波動嘅戲，真係幾吃力，如果得獎對我好大紀念，又覺得個獎可以連繫埋個仔，當時又要湊仔又要工作，都想攞到獎。」而今次拍廣告，敏之覺得劇集反應有功勞，另一方面係阿仔帶俾佢嘅luck，所以會將啲錢儲起俾阿仔，覺得啲錢囝囝都有份。
更多娛聞，喺晒《娛果》
http://fb.com/appledailyent
【minigame】2017瘋暈人物 返工打機唔使擇日
http://bit.ly/2CeWQkP
