陳慧珊（Flora）、Mr.的鼓手杜志烜（Tom）一家三口，及江碧蕙與混血網球教練丈夫Jerome等早前為ViuTV全新節目《婚姻五重奏》分別遠赴5個不同地方，了解異國婚姻文化及分享夫婦間相處之道。
Flora同老公鍾家鴻到尼泊爾拍攝，今次亦係佢丈夫首次亮相幕前，Flora指好多人認為當地資源同設施不足，生活比較艱辛，但佢睇到嘅正正係當地人感恩自己所擁有一切開心笑臉，Flora話：「我有帶埋囡囡去但冇出鏡，探訪當地小學時，佢都見到學校擺設好簡單，亦知道自己係好幸運。」問到同丈夫喺旅程中有冇增進感情？佢話：「不嬲都咁好，我10幾歲就識阿Mike（鍾家鴻），我同我前夫去接佢同太太（前妻）飛機，就係第一次喺波士頓識嘅，同佢前妻又係好朋友，大家仍然有聯絡，所以我哋互相好清楚了解。」
上個月Flora入稟控告香港凱莉山（Mount Kelly Hong Kong）追討192萬款項事件（新聞連結：http://bit.ly/2CQu7pU
），佢話事件已進入法律程序，所以不作回應，至於有冇打亂女兒升學計劃，佢指自己一直冇回應任何事，所以不欲談。
至於Tom同太太何思諺（Leanne）帶埋囝囝出席記招，但出發到伊朗嘅行程就冇囝囝份，由於出發前一星期當地發生恐襲，佢哋兩公婆曾經為應唔應該繼續出發而爭拗，Tom話：「太太係好鍾意旅行，聽到有得去就得，我就收到隊友、朋友電話指去會有生命危險，到拎簽證當日仲傾緊可唔可以轉地方或延期。」Leanne指最後諗住人一世物一世便去，點知8日行程中第4日，夫婦兩人已經愛上伊朗唔捨得走，Tom自認怕死，尤其自細經常睇戰爭片，腦海好多戰爭畫面，問到係咪覺得太太好任性？佢話：「我美化啲講，佢係好硬淨嘅女仔，20歲就生小朋友。」
 （攝影：陳俊強） |  Flora話今次去拍攝，有帶埋囡囡去，雖然冇出鏡，但都有得着。 |  但Flora拖住嘅只係小model，佢囡囡冇現身。 |
 鍾家鴻今次都有份去拍攝，係佢首度現身幕前。 |  Tom帶埋囝囝杜卓霖出席活動 |  卓霖錫錫媽咪，Leanne勁冧。 |
 江碧蕙與丈夫Jerome |  |
