李佳芯、森美、Amanda S.、朱晨麗、何廣沛等今日喺尖沙嘴出席護膚品牌活動，以情侶檔現身嘅朱晨麗同何廣沛齊穿黑衫，佢哋表示大會要求黑色，點知其他人就著淺色衫，大會係咪想突出佢哋兩個？何廣沛話：「可能啦，別有用心！」佢哋笑指唔知情侶檔嘅酬勞有幾多，因為係公司幫佢哋傾。追問佢哋現時係咪一齊拍拖？朱晨麗話：「係一齊拍檔，不過我希望《超時空男臣》開續集，我哋可以開花結果。」現實生活中呢？朱晨麗笑指有排，何廣沛就叫朱晨麗「等下先啦！」
講到李佳芯今年有份角逐視后，佢話：「唔會緊張，因為新加坡嗰次對我嚟講係太爆冷。」再攞都覺得爆冷？森美幫口話：「第一次係爆冷，第二次就係肯定。」李佳芯直認新加坡嗰次俾佢一個強心針，佢就話睇好田蕊妮，森美就睇好李佳芯同陳豪，佢仲話：「我太太唔想睇我同李佳芯咀嘴戲，我明白佢係錫我。」
 攝影：黃曉妍 |  以情侶檔現身嘅朱晨麗同何廣沛齊穿黑衫 |  追問佢哋現時係咪一齊拍拖？朱晨麗話：「係一齊拍檔。」 |
