喺描寫師生戀嘅電影《以青春的名義》中，劉嘉玲首次擔任監製兼演員，同被嘉玲譽為「年輕版梁朝偉」嘅新人吳肇軒合作，《以青春的名義》喺有限嘅製作資金下完成，嘉玲碌盡人情牌，唔收片酬，完成今次推動香港電影使命，二人日前於金鐘接受訪問。
嘉玲強調，喺很有限嘅資金下，可以做到已經好好，對於首次當監製，嘉玲話：「做監製係好大挑戰，愈來愈發覺，做電影唔容易，猶其是資金短缺嘅狀況下，好難可以發揮到最好。監製難做，因為要去拜托人，佢哋都唔收錢，我欠佢哋人情。」今次製作費控制喺一千萬以下，嘉玲指眾人嘅付出都係無價，佢話：「阿叔（張叔平）幫我哋剪接，區丁平做美術，輝哥（蔡崇輝）做攝影，全部都冇收錢，當然我都冇收錢，係欠好多人情，但我覺得自己好幸運，呢班睇住我大，陪我成長嘅專業電影工作者，佢哋都係好有心幫助香港電影，我哋香港電影原地踏步，要做得更加好。」
經過今次嘗試，嘉玲話下次會再做監製，佢話：「我下次揾多啲錢嚟，報答番佢哋。今次係艱難項目挑戰，其實我想保護自己，因為我鍾意呢齣戲，我鍾意呢個角色，我要參與演出，更加要揾我信得過嘅人嚟做好每一部份。」嘉玲透露，今齣戲係莊文強揾佢合作，嘉玲話：「因為《無間道》嘅關係，我哋拍戲之餘，佢都會同麥兆輝嚟我屋企，同梁生傾戲傾劇本，呢個導演同劇本係佢推薦俾我，基於我對佢嘅信任同安全感，就約見咗呢位導演，大家都係想將香港電影做好啲。」
嘉玲有份一齊揀選演員，最終吳肇軒成為男主角，嘉玲話：「我揀佢係因為佢似後生嘅梁朝偉，佢有憂鬱嘅眼神，佢好似受咗傷害，好想保護佢，但佢實質生活於幸福家庭，唔知點解有呢種眼神，佢好合適呢個角色。」嘉玲話有同偉仔講吳肇軒嘅存在，佢話：「偉仔未睇呢套戲，佢好忙，唔得閒俾意見我，佢會好支持我。監製一職好啱我做，因為我83年讀訓練班，已入行33年，我喺呢行有好多好好朋友同網絡，我覺得我可以用專業角度去完成專業嘅事情。我能力範圍之內都會栽培新人，已經開咗製作公司，公司會簽新演員，演員要不斷有機會練習。」
做過監製嘅嘉玲，會唔會試吓做導演，嘉玲話：「導演唔係咁容易做，佢要知道晒所有天文地理、藝術、生活品味，所有嘢要有好高體驗，先至可以拍到精良嘅戲，唔係人哋寫一個劇本俾我，搵一個專業攝影就做到導演，我未有資格做導演，我顧全唔到。我可以做監製，如果我做監製一定會揾梁朝偉，但要講緣份，價值方面唔會友情價，我會比雙倍佢，在公在私。」
戲中嘉玲嘅婚姻觸礁，老公出軌，嘉玲話：「我唔知，如果我遇到呢啲事會點，我嘅情感有好多階段，我青春時都有猜忌、妒忌、憤怒，打交都有，但慢慢成長，任何嘢都可以坐低慢慢傾，最重要係你有冇心，有冇珍惜呢段情感同對方，有冇好誠實咁面對呢樣嘢先係最重要。」至於戲中描寫嘅師生戀，嘉玲話：「師生戀每個人都曾遇到，只係道德觀念，未成年唔可以做呢樣，喺老師角度，一個男仔喺你遇到人生低潮時，走入你嘅生活，俾你温暖、關懷，係人都會溶化，一個人給予依靠，唔分年紀、身份同性別，就算同性之間，一個人俾你體温、愛你，你都會溶化，我肯定有仰慕過長輩。」
吳肇軒係王家衛迷，佢話：「我好鍾意嘉玲姐做戲，《阿飛正傳》、《2046》、《東邪西毒》，《大內密探零零發》裏面都好正。每次聽到嘉玲姐叫我軒仔都感到好開心。嘉玲姐好nice，只係兩個角色之間嘅關係，我亦相信只要唔緊張，先至係對嘉玲姐同所有人嘅尊重，平常心去做到本份，話似梁朝偉係受寵若驚。」嘉玲話，佢一埋位都唔似新人，佢嘅起步同梁生都係一樣咁幸運，至於可以行幾遠，祝佢好運。
劉嘉玲
髮型：Ken Hui
化妝：+0
吳肇軒
髮型：Ziv@O4 Orient4
化妝：BonBon@MODMakeupAcademy
【minigame】2017瘋暈人物 返工打機唔使擇日
http://bit.ly/2CeWQkP
更多娛聞，喺晒《娛果》
http://fb.com/appledailyent
