曾幾何時，香港人最愛電視撈飯，當年電視劇主題曲同插曲，就好似電視撈飯時嗰碗老火湯，令人回味無窮。
童星出身嘅黎小田，75年開始喺麗的電視(亞視前身)擔任音樂總監，短短8年間作過數以百計膾炙人口嘅電視劇主題曲同插曲，包括《大地恩情》、《天蠶變》、《人在旅途灑淚時》、《戲劇人生》、《找不著藉口》同《驟雨中的陽光》等等，地位等同為無綫作過無數經典主題曲嘅顧嘉煇，係麗的劇集主題曲嘅靈魂人物，而歷年佢所作嘅hit歌重有《問我》、《胭脂扣》、《儂本多情》同《心肝寶貝》等超過700首。
現年71歲嘅黎小田，下月17、18日會喺紅館舉行《小田金曲50年》演唱會，而今次亦係佢繼80年同88年之後，第三度舉行作品騷。
日前黎小田接受《蘋果》專訪時，透露今次演唱會請嚟好耐冇喺香港演出嘅周華健、陳曉東、湯寶如、陳美齡、葉振棠、薛家燕同柳影虹等好友演出。關正傑當年因為唱咗黎小田《天蠶變》、《大地恩情》同《人在旅途灑淚時》等歌而走紅，80年代黎小田兩次開騷，關正傑都有份做嘉賓，不過90年代佢退出樂壇移民美國西雅圖做則師，唔知黎小田今次開騷有冇搵關正傑出山？黎小田話:「有打過比佢，已經好好㗎啦，可以同佢通到電話，平時嗰啲通唔到電話架，佢都係唔肯出嚟，煇哥又叫過佢，好多人都叫過佢，佢都唔肯出嚟，佢覺得佢真係退休啦，佢連做則師嗰方面都退埋休啦，所以佢都唔肯出嚟。」
除咗關正傑之外，唱開英文歌嘅葉振棠，亦都係黎小田搵佢唱主題曲同插曲而走紅。黎小田就解釋話:「我哋嗰時冇乜歌星，全部無綫簽晒，我惟有搵啲唱英文歌嘅朋友嚟幫我唱中文歌，包括曾路德、葉振棠、陳潔靈。錄音時我叫佢哋當英文歌唱，譬如顧嘉煇比仙杜拉嗰隻《啼笑因緣》，雖然佢加啲中樂喺度，但佢啲和弦都係比較西式，我哋有啲歌係擺英文字都唱到，所以我叫佢哋照英文歌唱法嚟唱粵語流行曲，卒之試到囉。」黎小田話當年喺麗的寫主題曲同插曲時，都會同當時嘅高層麥當雄及李兆熊等人開會，知道故仔係乜嘢之後先至開工。
當年無綫同麗的劇集競爭激烈，連帶主題曲都一樣會鬥，黎小田話:「有㗎，梗係唔夠佢哋鬥啦。」佢話同顧嘉煇私下係好朋友，當年煇哥寫咗首《楚留香》，搵秋官唱主題曲，未出街之前煇哥比黎小田聽過，由於麗的同期都係拍楚留香題材嘅《俠盜風流》，黎小田聽過首《楚留香》覺得太正，佢作《俠盜風流》主題曲好難同秋官比，於是就想出一個辦法，黎小田笑住話:「我就走精面，搵咗個新人唱，起碼出嚟冇得比，一個新人嚟咋喎，邊有得比啫，我搵咗陳秀雯唱，橫掂唔夠fight。」
