55歲嘅許晉亨貴為船王許愛周個孫，同爸爸許世勳一樣都係出名嘅馬主，不過佢就真係拍馬都比唔上爸爸，因為許世勳前晚成為本港職業賽馬首位贏得100 Win嘅馬主。喺前晚快活谷第四場四班一哩賽中，許世勳名下喺告東尼馬房嘅「獻惑」勝出賽事，而許晉亨仲代冇到現場嘅爸爸拉頭馬。（新聞連結：http://bit.ly/2D0ZsFB
）
平時同老婆李嘉欣非常之咁恩愛，兩公婆大多時間都係合體現身，而且每次都拖到實一實，絕對係見少一秒都空虛。而前日亨亨一個人去到馬場，未見太太李嘉欣嘅身影，不過其實亨亨冇忘記到屋企，事關《蘋果》前晚發現亨亨去馬場之前去咗跑馬地行寵物店，仲打電話返屋企問意見o添！
前日大約黃昏5點幾，著到西裝骨骨嘅亨亨，去馬場前一個人去到跑馬地，做乜呢？原來佢要去寵物店入貨。相信有養寵物嘅朋友都知道，「奴才們」走埋一齊一定傾唔停，情況同怪獸家長談論子女升學一樣，唔講猶自可，講開就真係停唔到嘴，就好似亨亨咁，佢喺間寵物店逗留咗一個鐘，直頭可以由幼稚園講到升大學喇！
亨亨同店員講啲乜就聽唔到啦，不過明顯同職員幾熟絡嘅佢，入到去揀完零食又睇下啲電毯，然後就到水兜，總之就乜都睇吓，期間佢邊揀同職員邊吹水，講到興起，仲連西裝褸都除埋，傾到尾聲，亨亨就再攞出手提電話係咁影啲小食，唔知係咪要請示老婆大人，最後就買咗一包小食走人。
 採訪、攝影：梁繼光、黃曉程 |  許晉亨去到快活谷代爸爸拉頭馬，夏佳理(左)都有嚟到支持。 |  馬會CEO應家柏仲親自恭賀。 |
 |  去馬場之前做咩好? |  亨亨就去咗寵物店入貨。 |
 |  |  一傾仲傾足成個鐘。 |
