0歲嘅江若琳（Elanne）去年4月宣佈同「生煎包王子」蕭潤邦（Oscar）拍拖，由好友升呢做情侶，兩人不時大肆放閃。Oscar 早前仲成功同Elanne求婚㖭！
o依家佢哋身在日本，嘆旅行仲不忘放閃。其實Oscar同江若琳每次去拍拖都好慳家，佢哋日前就趁冬日陽光出去郊遊，Oscar決定用300蚊同江若琳玩轉大埔，玩齊踩單車、嘆豆腐花、划艇、摸蜆同睇日落。江若琳同Oscar着住情侶裝殺入大埔，準備愉快旅程。
景點一：大尾篤踩單車 $30
佢哋首站即往租單車，江若琳發揮慳妹本色講價講到可以用30蚊平租一輛家庭單車出發郊遊，Oscar繼續做「御用柴可夫」，出力踩車，佢迎風邊踩，心情大靚下更哼出一句：「面對當年情.....」江若琳就問：「呢首乜嘢歌？」Oscar答係劉德華主演電影《烈火戰車》嘅《情深的一句》，Oscar再唱：「真心說句.....」江若琳毫不畀面揶揄男友清唱走音：「你估你真係『華Dee』咩。」Oscar懶理繼續自我陶醉。
景點二：划艇 + 嘆豆腐花 + 飲品 $58
兩人踩單車途經大尾篤主壩，見到碼頭有得租艇划，江若琳同Oscar就棄車出海，江若琳使出「價講」絕招租艇，獲老闆娘免費請吃豆腐花，當然一碗兩份食，又晒溫馨。首次撐艇仔嘅江若琳坐定即興奮話要撐出海中心，Oscar神回：「要call定水警，趴到出去我應該冇晒氣。」兩人雞手鴨腳又唔協調，結果小艇喺水中不停打圈，Oscar話：「我都有啲暈。」唯有埋岸。
景點三：摸蜆 $55
上山下海都意猶未盡，江若琳同Oscar即興決定去摸蜆，江若琳同Oscar手上當然欠缺「架生」，於是佢哋就去咗士多去買膠筒同小鏟，諗住黃昏趁水退去海邊摸蜆，「吔吔烏」下都略有收鑊，江若琳見到巨蜆又為食癮起：「我想一半用嚟燒，一半清酒煮。」摸蜆同時，佢哋又欣賞埋好靚嘅日落，Oscar情深擁着未婚妻享受良辰美景。
三個景點，江若琳同Oscar半日郊遊，圓滿結束，江若琳埋單計數，只用咗143蚊，佢話：「三嚿水真係多咗，我哋平時起身食吓車仔麵、魚蛋粉，做下運動，所以今日算好豪，係豪華團，又搲到免費豆腐花。」Oscar話只有特別日子先去高級餐廳：「我睇佢每日鍾意玩邊種情調。」全程Oscar肉緊江若琳唔識講價，問佢怕唔怕將來娶咗佢，亂使家用，Oscar話：「冇所謂，有錢一齊用，佢有時都闊佬請我睇戲食飯，至緊要大家開心。」睇嚟呢對準蕭生蕭太真係襯到絕。
