無綫一年一度嘅《萬千星輝頒獎禮》將於今個月21號舉行，坊間盛傳無綫決定將頒獎禮順延1個月，查實為咗可以預埋《溏心風暴3》一齊爭獎，話晒經過一輪黨派爭奪戰，助理總經理杜之克已經成功插手入戲劇組，令到珍姐一統天下嘅夢碎，跟杜之克仲自組班底，搵咗好多舊人回巢，好多仲要係當日離巢轉投港視嘅人，加上嘗試同大陸合作拍劇，當然希望可以藉住獎項省靚招牌！
雖然最終《溏心風暴3》有一班老戲骨，好似李司棋、夏雨、關菊英同米雪助陣，不過似乎對聲勢方面都冇乜嘢幫助，收視更加係持續低收，網民嘅反應麻麻，結果大家嘅焦點又繼續返番去其他劇集身上。當日杜之克以「優化」為大前提，重金禮聘搵咗林文龍同宣萱合作拍劇集《不懂撒嬌的女人》，結果飾演女強人Mall姐嘅宣萱人氣急升，嗰陣佢嘅風頭可以話一時無兩，除咗令到宣萱賺到笑之外，11月喺雲頂舉行嘅《TVB馬來西亞星光薈萃頒獎典禮2017》，宣萱仲憑住呢套劇擊敗勁敵李佳芯，成功坐上視后寶座！
正因為呢個原因，《不懂》喺今屆頒獎禮成為頂頭大熱，雖然曾經有傳話江美儀同唐詩詠都係熱門嘅視后人選，不過據知大台中人都係偏向俾《不懂》嘅宣萱，視帝爭奪戰方面，由馬國明嘅《降魔的》同王浩信嘅《踩過界》熱鬥！再加上今年無綫又玩全民投票，視帝視后統統有得揀，宣萱同馬國明一直都受到網民熱捧，睇嚟賽果亦呼之欲出！
被視為頂頭大熱嘅宣萱，日前喺中環接受《蘋果》專訪，雖然坊間一致睇好佢稱后，不過佢話：「信心細咗，拎咗再拎機會好微，始終我離開咗公司咁耐，有好多因素導致有影響，對我嚟講有梗係開心，冇嘅話咪繼續做。」宣萱仲話：「但係得到網民認同，呢樣好满足，好鼓勵，對我嚟講已經好足夠，拍劇最終嘅結果係唔會知，不過有觀眾支持、口碑已經好足夠，好過你俾咗個獎我，但係出到去俾人話難睇！」
宣萱仲有感發咁分享咗一個經歷，佢話：「我記得好多年前有一個雜誌頒獎禮，嗰年攞咗個最受歡迎獎，佢哋搵咗郭富城頒獎俾我，城城喺耳邊細聲同我講：『實至名歸』，聽完之後真係好開心，我到o依家都好深刻，呢個感覺好窩心。」
查實宣萱喺99年憑住《刑事偵緝檔案》成為視后，相隔近20年，宣萱話心態同以前都唔同：「以前喺心態上都會緊張，我仲好記得嗰晚個心係卜卜咁跳，但係o依家冇咗緊張心態，好隨緣，因為知道好多嘢都唔係自己控制，亦都唔會係因為套劇收得就有機會，事實上係冇直接關係，有得攞梗係開心，冇得攞都ok，過程同觀眾嘅反應最緊要！」
之後問到宣萱心目中嘅視后人選？佢話：「公司永遠有個驚喜，真係好難講，今年有咁多個候選佳麗，鮑姐、司棋姐同埋菊姐等等，個個都機會大，真係好難講，所以我都費事估，到時咪知！」唔知有冇內定呢？宣萱哈哈笑話：「唔知喎，呢個要問公司，要問高層，只係參與演出，啲人傳同公司bargain吓就得，不過我唔會做呢啲嘢，人哋覺得你係值得去攞，自然會俾你，如果我要攞住份合約去行住人哋先肯俾，我攞咗都唔會開心，好似係要脅人哋俾我，我攞咗都覺得冇意思！」
採訪：何慧斯
服裝：IRO from I.T
場地：Fridge
精選娛聞，喺晒《娛果》
http://fb.com/appledailyent
 攝影：林賓尼 |  |  Mall姐嘅魅力驚人！ |
 |  因為Mall姐，宣萱被視為頂頭大熱！ |  宣萱話平常心睇獎項！ |
 |
