由陳奕迅同李榮浩主演嘅電影《臥底巨星》，今晚喺旺角舉行首映，陳奕迅、谷德昭、劉浩龍、許紹雄同埋海報師阮大勇都有嚟到。
為無數香港電影設計過唔少精美海報嘅阮大勇今日都有到場支持，佢話：「自己畫咗六十幾年，每次畫海報都覺得好難，今次我畫陳奕迅先生同李榮浩先生，李榮浩畫到隻眼細啲就似，但係陳奕迅就好難，樣樣嘢都好平均，不過今次見到真人，原來陳奕迅對眼好大好有神，如果下次再合作的話我會畫得好啲。」喺身邊嘅導演谷德昭就話：「如果再合作，叫佢著短褲啦，佢碌髀都好粗㗎。」
谷德昭係呢套戲嘅導演，佢就講到Eason今次又好笑，又親身上陣拍動作戲，佢話：「Eason喺拍之前兩個星期，佢要去做啲訓練，洪天祥就做佢嘅指導，拍嗰時都係拍咗打戲先，等佢後面可以舒服啲，不過我都多謝Eason，作為實力偶像派，佢喺戲入面都有好多造形豁出去。」
喺電影入面陳奕迅飾演一名動作巨星，少不免會有好多動作場面要拍攝，問到佢有冇受傷，Eason就話：「都有啲嘅，好似嗰朝拍『醉拳720』就最難，勒住咁轉體三周。」點解今次咁難得會拍喜劇？Eason話：「其實好多因素，15年拍完《擺渡人》之後，自己做咗兩年巡演，覺得生活好死板，其實我覺得自己唔好笑㗎，但係谷德昭話我唔係，咁我咪拍囉，拍嘅時候反而好投入，仲好開心。」
劉浩龍喺戲中就做Eason嘅武術指導，佢話：「我就點Eason打嘅，不過後來導演就安排咗一場我打Eason，為咗呢場戲我練咗三日。」
 為無數香港電影設計過唔少精美海報嘅阮大勇今日都有到場支持。 |  谷德昭係呢套戲嘅導演，佢就講到Eason今次又好笑，又親身上陣拍動作戲。 |  佢話：「我都多謝Eason，作為實力偶像派，佢喺戲入面都有好多造形豁出去。」 |
