韓國神劇《太陽的後裔》嘅宋仲基同宋慧喬，去年10月喺首爾舉行世紀婚禮，由於雙宋喺韓國人緣甚廣，當中有唔少圈中人去飲，喬妹嘅好友玉珠鉉仲喺婚禮上獻唱祝歌，令喬妹感動到喊。
喬妹同玉珠鉉相識成20年，感情一向好好，噚日玉珠鉉上咗SBS電台節目《崔華晶的Power Time》，玉珠鉉就喺節目上提及喬妹，佢自爆雖然同喬妹咁老友，但大家原來從未問過對方有冇男朋友等話題，佢話：「我哋冇猜測或者刻意問對方感情事，只係話有好消息時就通知對方就可以。」
提到喺雙宋婚禮上獻唱《A Whole New World》，玉珠鉉話想表達雙宋童話式愛情，事前亦得到喬妹同意。至於喬妹喺婚禮上流淚，玉珠鉉話：「好奇怪佢流淚，佢本身唔係輕易喊嘅人，但係喺我唱祝歌時，我見到佢嘅鼻頭都紅晒，睇到咁我都忍唔住喊，唱咗四句都唱唔落去，所以我先重唱一次。」
