胡楓（修哥）今日去到新城電台接受訪問，聽日係佢嘅86歲生日，主持人范振鋒同程凱欣送上生日蛋糕俾佢，修哥話：「我每年嘅生日願望都係一樣，自己身體健康，屋企人、朋友工作順利。」修哥話外地嘅仔女孫兒都返嚟同佢食飯慶祝。
修哥將於下月喺紅館舉行「胡楓86破晒紀錄演唱會」，仔女到時會睇埋佢嘅演唱會先走，修哥話：「6個孫會一齊唱歌俾我聽，佢哋都有練歌，我都有勤力練歌練舞，又要練氣，聽日生日都照綵排，唔好嘥時間。」
修哥契女林憶蓮前日神秘現身送上蛋糕（新聞連結：http://bit.ly/2FKhgDz
），修哥話好感動好開心，因為佢唔知對方會突然出現，至於憶蓮會唔會擔任演唱會嘉賓，修哥話：「佢好忙，抽唔到時間，對上嗰兩次佢都有做嘉賓。」
