陳瀅今日喺銅鑼灣出席活動，之前放假返加拿大探親，期間玩滑雪，但佢指此行並冇認識新朋友，即係冇艷遇。對於舊愛猷亨做上海市政協委員，猷君喺IG晒合照兼硬sell阿哥係單身，揚言幫阿哥徵婚一事，陳瀅笑言：「咁嚴重？咩叫徵婚？」


被問之前同猷亨被影到一齊睇煙花，係唔係已經復合?陳瀅強調自己係單身，唔知對方係唔係，佢哋間中都有聯絡，暫時仍然係朋友關係。


問番佢喺新劇《平安谷》破格演出，噚晚播出街嗰集，講陳瀅為同村女村民犧牲自己，引火自焚，陳瀅坦言拍呢場戲幾艱辛：「做咁多角色最辛苦呢次，拍攝場地一帶都係墓地，劇中話我跌入個墳係真嘅木墳，而且喺泥窿入面爬，真係驚，聽番劇中小朋友唱歌真係會心寒，但之後可以挑戰拍鬼片。」此外，講到好友朱晨麗同蔡思貝等得獎，陳瀅都戥老友開心，稍後才約食飯見面。


(攝影：葉君海)