39歲孫燕姿同荷蘭籍老公納迪姆結婚7年，生咗5歲大囝囝「納小子」，近期屢傳懷孕，均遭經理人否認，前日喺新加坡有fans邀合照並po上網，見孫燕姿肚有少少凸，佢今早終於喺微博宣佈：「是的，我已胖若兩人。」所屬環球亦發聲明證實孫燕姿有咗，今年將迎接佢哋第2胎。據知孫燕姿目前重咗2公斤，懷孕初時暫時未知BB性別。
孫燕姿去年11月以感冒為由，取消去台灣嘅所有通告，當時台灣《蘋果》報道指孫燕姿因懷孕初期身體不適，高齡懷孕較辛苦，不宜工作太忙，避免搭機奔波，先臨時取消行程，不過當時經理人稱「沒有懷孕，但很想有，希望承媒體金口」，後嚟又傳出孫燕姿預產期喺7月，不過經理人都係冇承認，估計係順應習俗「懷孕未滿3個月唔可以講」，今日可以宣佈，即係佗B已三、四個月。
孫燕姿所屬環球音樂代宣佈喜訊，並指孫燕姿今日將赴上海工作，周六(27號)出席當地歌迷會。
孫燕姿懷孕聲明：
致媒體先進朋友,新年快樂！
MAKE/MUSIC以及環球音樂在此共同分享旗下藝人孫燕姿以及其先生的好消息，經醫生確診，燕姿一家在可預見的2018年即將迎來新的成員，家人們都很開心也很期待。
謝謝各界關心，也希望媒體先進以及歌迷朋友能讓燕姿以及家庭成員保有其私人空間，並同時與我們一起獻上祝福。
