陳小春同應采兒近年不時喺大陸拍真人騷，而早前佢哋就去咗香港迪士尼拍攝綜藝節目《年味有FUN》，佢哋仲重遊2010年兩人舉行婚禮嘅地方，順便慶祝結婚周年。佢哋仲預早食年夜飯，應采兒話佢嘅新年願望係增添多位家庭成員，想生個女咁話，令恨生女恨到發燒嘅小春見牙唔見眼。


飯後指定動作係去美國小鎮大街百貨店shopping，應采兒又先後同公主、鐵甲奇俠影相，玩下機動遊戲咁，仲話下次要帶埋囝囝Jasper一齊嚟。


咪住先，此行明明係開工拍嘢，所以應采兒都好認真咁，埋位跟大廚學整甜點，呢個時候小春就靜雞雞溜咗去，之後好戲劇化咁由成班舞蹈員簇擁下再次「驚喜現身」，原來係想老婆大人重溫婚禮美好回憶，迪士尼仲安排咗當年兩夫婦洞房嗰間套房俾佢哋住。


小春表示：「香港迪士尼見證咗我哋嘅婚禮，今次重遊又俾我哋好多新嘅浪漫回憶，呢度對我哋成家人嚟講都係充滿美好回憶嘅地方。」真係識講嘢。





陳小春同應采兒近年不時喺大陸拍真人騷，而早前佢哋就去咗香港迪士尼拍攝綜藝節目《年味有FUN》。
佢哋仲重遊當年舉行婚宴嘅地方，順便慶祝結婚周年。
10年喺迪士尼舉行婚禮，蛋糕上面有好多米奇同米妮。（資料圖片）
（資料圖片）（資料圖片）