吳綺莉(Elaine)今日邀請蘇民峰去咗大埔住所，為奇妙電視節目《狗年人人行好運》拍攝。吳綺莉笑言：「蘇師傅叫我唔好用前門，要用後門出入，對各樣都好啲，不過我只會當一個參考，我平時好少睇風水。」唔知呢個方法又會唔會改善同卓琳嘅母女關係，吳綺莉話：「自己都要學相處，我哋有溝通，做到老學到老，我哋都唔係冇聯絡。」
講到卓琳會唔會返屋企同過農曆人年？Elaine話：「屋企嚟㗎嘛，鍾意幾時返咪幾時返，佢都大個喇，我由細到大習慣咗過年屋企都冇人，唔係好著重節日，又唔會有人嚟屋企拜年，最多都係去朋友屋企過年。」但係又會唔會介意佢帶密友返嚟？Elaine話：「佢平時帶啲朋友返嚟，我都OK。」
唔知又有冇搵師父贈幾句？Elaine話：「我哋識咗20幾年，好多年前佢已經同我講，好多整定概，我自己都覺得好多嘢都唔係我哋控制，亦唔係可以有得揀，唯一係做好自己啲嘢。」咁師父有冇叫要珍惜母女緣份？佢就話：「不嬲都係要珍惜，係相處方法，呢啲唔關命理嘅事，我諗每個父母喺唔同階段都要有轉變，唔同年紀嘅相處方法都唔一樣，佢係成年人，大個喇！」
至於會唔會先要接受佢嘅另一半？Elaine話：「其實佢個個朋友我都冇唔接受，每個階段會識得唔同嘅人，唔係父母去講，係要自己感受同體驗，所以冇得選擇，要俾佢自己去試。」
蘇民峰話Elaine一直用咗損財傷丁嘅大門，建議佢改用旺丁旺財嘅後門，就可以大大改善屋企所有唔好嘅事情，蘇民峰仲話：「用後門有90分，用正門負分，唔止母女關係可以改善，其他人緣都可以。」蘇民峰亦都話有建議Elaine唔好俾太多意見個女，要搵唔同嘅方式相處。
