話晒愛不分地域種族界限，家陣跨國結婚都係等閒事，梁詠琪（GiGi）有個西班牙籍老公Sergio Crespo Gutes，兩人於2011年結婚，一直都勁sweet，其實唔少圈中人嘅另一半都係唔同國籍㗎！
好似名模周汶錡（Kathy）咁，佢同法籍老公Julien Lepeu於2012年結婚，並先後誕下兩名寶貝仔Jacques同Avner，Kathy嘅兩位小公子都非常趣緻，其中哥哥Jacques仲好受網民歡迎，有佢嘅post，啲點擊率都會高啲。
而近排生完第二胎嘅官恩娜（Ella）都差唔多，佢老公Juan Domingo Maurellet係中法混血兒，Ella喺婚後積極造人，至今已成功誕下一子一女，湊成好字。而主力湊B嘅Ella，仲不時喺網上社交平台分享生活事，噚日先「些牙」完佢餵奶前不慎倒瀉奶嘅「大慘事」（新聞連結：http://bit.ly/2Fn8uu8
）。
除咗女星，有唔少男星都係跨國結婚，好似打得、睇得、演得、監製又得，連做建築都得嘅型男吳彥祖，佢太太Lisa S.係中法加猶太嘅混血兒，兩人於2010年結婚，約3年後一索得女吳斐然（Raven），雖然吳彥祖成日要周圍飛去拍戲，但Lisa S.有時都會跟埋去，務求多啲family time。
而近年多咗喺香港現身嘅安志杰，佢太太Jessica C.（JC）係中美混血兒，佢哋未婚時生下大女Tessa，到舊年再補辦婚禮，舊年聖誕節前夕宣佈再度造人成功，JC正在懷第二胎。
