陳柏宇（Jason）年初喺頒獎禮掃咗唔少大獎，今年係佢婚後同太太符曉薇第一年過嘅情人節，噚日佢為手錶品牌Daniel Wellington喺銅鑼灣嘅旗艦店開幕擔任剪綵嘉賓，仲做咗一日明星店長。Jason事後都講笑話自己唔夠稱職，仲話自己唔係「陳柏宇」應該好快畀人炒咗，不過有機會試下做唔同嘅嘢都好開心，係好難得嘅機會。
問Jason打算點同老婆慶祝情人節？佢話未plan：「我哋啱啱去完泰國玩，去咗差唔多一個星期，都係行下街食下嘢咁，我諗情人節都係食下飯，或者喺屋企食，叫外賣都冇所謂。」笑指佢唔夠浪漫，Jason就話平平淡淡都可以浪漫，太太同佢諗法都一樣。叫Jason趁出席手錶活動，送手錶畀太太做禮物，佢就即刻話好提議，因為太太一向有戴錶習慣。
