亞視返嚟喇……新亞視個app真搶佔咗app store下載第一位，真係好難估。
為咗壯大聲勢，請咗好多嘉賓，以往一班《歡樂今宵》（EYT）成員盧敏儀、杜平、蔡和平、丁羽同寇鴻萍拉隊過咗去支持，連劉錫賢、朱慧珊同曾華倩都要認係後輩……
當年亞視熄機，大台吸納咗好多亞視藝人，蔡國威、林韋辰等等都過咗檔，連鮑姐都幫大台拍咗套《同盟》。今日亞視啟播禮，見到好多TVB舊面孔，雖然陳志雲病咗去唔到，但就見到佢好好好朋友王喜擔任主持，仲有港姐向海嵐、陳妙瑛同曾華倩等等。
之前亞視宣傳話過target係年輕人，成晚節目表演次數最多嘅係年過30嘅可嵐、kellyjackie等藝人，另外仲有韓星南太鉉都好貼近年輕人口味。
 攝影：林賓尼 |  盧敏儀、杜平等EYT成員，以嘉賓身份去晒新亞視打氣。 |  向海嵐、曾華倩等等TVB舊人都過咗檔。 |
