周星馳出名尖酸刻薄又計較，先後被向太陳嵐、黃一飛、李力持、田雞、王晶等人公開數臭，至於曾因拍《功夫》鬧不和的吳孟達在經歷生死後，對星爺的行為卻有另一番睇法，他說：「星仔份人以前係自私啲，但近年都有所轉變，有時人去到某啲位就會不斷自我膨脹，聽唔到人講嘢，最記得當年為《百變星君》配音，聽住星仔鬧阿媽無幫佢落訂買樓，可能當時係損失咗一百幾十萬，但有乜緊要啫，有本事第日搵更多，正如我哋當年夾份搞生意蝕錢，我都寧願自己孭曬，退返所有錢畀佢，之後仲收封利是就幫佢埋位拍《食神》和《少林足球》，有時做人係咁，明知人哋搵你著數、佔你便宜又有乜所謂？咪隻眼開隻眼閉囉。」採訪：彭子僖 攝影：李權威
※去年大幅減產的吳孟達笑言因《導火》題材夠貼地才願意開幾日工過戲癮。
場地提供：香港九龍貝爾特酒店
現年64歲的吳孟達，去年因心臟急衰竭被送往深切治療部，跟死神交手才懂珍惜生命，大幅減產的他為求過戲癮，接拍電影《導火新聞線》，「我鍾意個劇本夠寫實，現今社會太多訴求，如果我哋政府肯接納意見都係好事。」戲中達哥飾演炸彈狂徒，為替被O殺的女兒討回公道，不惜脅持人質向特首申冤，整部電影張力十足。
越洋叫阿媽買樓
訪問這天見達哥精神不俗，有問必答，當話題轉到昔日戰友周星馳，達哥即說：「其實《功夫》之後都無點聯絡，以前大家咩都傾，得我一個敢對佢發脾氣之嘛，最記得當年去夏威夷拍《百變星君》，見佢叫屋企人幫佢落訂買樓，到返港配音聽到佢同阿媽通電話，好似係阿媽無幫佢落訂，但個價位已經飆升咗，佢就大聲咁話『你有冇搞錯？叫你咩咩咩……』譁，一講完電話我即拉佢出露台，點支煙同佢講『喂，唔可以咁講，話曬阿媽，可能真係令你有損失，錢之嘛，令你損失一百幾十萬有乜緊要啫，有本事第日搵更多。』，結果佢有冇返去同媽媽道歉我唔知，但其實佢嗰陣剛出嚟拍戲係白紙一張，好多嘢一知半解，除了電影，生活上、人生上、做人上都有自己偏向，可能係單親家庭長大，會好保護自己。」
※飾演炸彈狂徒的吳孟達 （右一）跟輝爺王宗堯對決一幕張力十足。
做生意輸打贏要
曾表示跟星爺沒錢財轇轕的達哥這天突然爆seed，他說：「以前試過一齊搞生意（91年天津辦傳呼台），每人掟五百萬現金出嚟，結果兩年輸掉四百幾萬，但我就話『唔好啦，星仔，係我叫你做，唔想你蝕，我畀返五百萬你，當你無做過。』」輸打贏要咁無道義？「係我唔識控制，當我total lose，當時我大概畀咗440萬佢，仲差60萬，後來我幫佢拍戲《食神》和《少林足球》幾乎唔收錢，如果片酬要計足當然唔止60萬，但我無同佢計，你畀封利是我，ＯＫ無問題，幫你拍十零廿日，收十萬，如果我出面收其他人，十萬拍一日，甚至一日都唔得，（算係咩都還曬？）唔敢咁講，無話邊個欠邊個。」
※吳孟達坦言若不是當年經歷長達四年的冰封期也未必識做人，「大家都知我爛賭又破過產，人係沉澱過先識珍惜。」
※吳孟達讚周星馳這次的《美人魚》故事完整，「主題得一句之嘛，但你睇嚇佢部戲有內涵，唔係得啖笑。」
※01年《少林足球》大收旺場，達哥笑言「無周星馳無吳孟達」，說得夠謙。
※星爺自小由媽媽獨力湊大，若不是達哥爆seed都唔知佢曾為錢鬧爆阿媽。
※吳孟達直言周星馳另一事業是搞地產，近年可見他在地產巿場發展順利。
