今日凌晨晒婚戒，宣佈將嫁「醫界王陽明」嘅阿嬌鍾欣潼，今日傍晚六點幾到灣仔英皇駿景出席惠英紅生日會，老闆楊受成、溫碧霞、湯怡等都會出席。阿嬌為免喧賓奪主，特登提早一粒鐘接受傳媒訪問。
原定6點現身嘅阿嬌，之後話6點10分到場，結果一再延遲，傳媒苦候半小時，Mani解釋謂阿嬌因為塞車致遲到，又稱阿嬌只係諗住「同大家傾下偈」，冇諗過咁大陣象。仲話希望大家見到阿嬌「擘大個口得個窿」嘅樣唔好影喎…
至6時40分左右，阿嬌先至現身。記招先以廣東話受訪，再用國語。
一臉疲態同緊張嘅阿嬌今日冇戴戒指，話：「我…唔記得戴。」大家叫佢舉高手影，佢一臉無奈大聲話：「我都冇戴！」
拍拖半年嘅阿嬌被問到是否求婚成功？佢有啲猶疑話：「應該係。」咁唔肯定？「我都戴咗戒指喇…」幾時求婚？阿嬌話：「生日嗰時求。（點求？）我想到時帶佢俾大家見下，等佢同大家講。」幾時？阿嬌反問：「你想幾時？」依家？「唔得呀，佢依家好烏where呀。」佢話係上周家中求婚。
咁依家男友喺邊「er…今日冇約佢出來，冇邀請佢。」佢話求婚時冇喊，「反而我噚日宣佈時面紅晒，未試過咁緊張，紅咗幾個鐘，好慶好緊張。」
 攝影：沈健程 |  阿嬌今日凌晨貼出求婚戒指相，不過今日就唔記得戴！ |  |
 |
