狄龍早前接受專訪，被問及會否有意重拍《英雄本色》？他劈頭便拒絕，理由是：「你點搵多個張國榮畀我？」令人眼淚幾乎奪眶而出。


最近狄龍有新片上映——賀歲片《一家大晒》，密密接受傳媒訪問，其中包括商台《1圈圈——星光背後》梁泰來嘅訪問。


狄龍憑《英雄本色》獲金馬影帝，演活無數大俠角色，但有一件事，狄龍好少提，原來佢曾經同《英雄本色》導演吳宇森反目。


狄龍喺訪問中坦言，曾經同吳宇森稱兄道弟，但拍攝《英雄本色》後期，就發生咗一啲不愉快經歷：「我做導演嘅時候，佢係幫我做副導演。我哋都算係兄弟班，甚至有時候，佢有啲橋段諗唔通，我哋都會一齊諗。冇所謂嘅，冇分邊隻手指長短。


「但拍到最後嗰陣，我同佢其實真係有啲唔愉快。其實劇本係有『圍讀』，『圍讀』係指大家可以將自己想要嘅（電影元素）都講出嚟。咁『圍讀』後，我哋就照劇本去拍。但最後就係出咗一啲枝節，完全唔係嗰回事。」


至於詳情，狄龍話，太太陶敏明唔俾佢再多講：「畢竟事過境遷，『船過水無痕』。我當時係同佢有啲唔愉快，但我堅持我自己嘅原則，就係我要拍好電影。如果有乜嘢改動唔係經過雙方同意，就唔係一部好電影。」


講到太太陶敏明，兩人由1975年結婚到現在。好難將「風流」二字同狄龍聯想埋一齊。狄龍話，自己都係男人，但「風流而不下流」：「每個男人都始終是一個男人嚟嘅，就係希望能做到『風流而不下流』。當你結婚喇，你係冇資格談戀愛。結婚之後，就唔係談情說愛，咁樣係違法嘅，要記得自己嘅底線係乜嘢。『人非草木，誰孰無情』，若自己做出一啲對唔住太太嘅事，自己內心都會唔舒服。


「『咁你有冇去過大富豪呀？有冇去過咩Club呀？』我都有去，但就只希望能做到『風流而不下流』、『樂而不淫』。」


狄龍自言，十分反對譚俊彥入行，「我對電影圈嘅人士，我係用好消極嘅睇法。我覺得好多人都係『賺到享唔到』，好悲劇，好多人會為咗拍戲而家庭失敗、朋友決裂。我見過太多唔開心嘅事，所以我唔鼓勵我個仔做呢行。你入呢行，你必須要有一個好堅強嘅意志，同埋守住自己底線。如果唔係，小小甜頭係冇咩意思。」


最港電影大獎投票網址