蔣雅文（Mandy）出新書《被討厭的處女》，單看書名已經引人入勝，但原來此「處女」卻解作處女座，來自香港嘅兩位台灣媳婦、同樣係處女座嘅Mandy同陸穎魚，交換相片與文字輯成呢本書。
負責攝影嘅Mandy日前返港同讀者見面，並抽空接受《蘋果》專訪：「處女座幾容易被人誤解好奄尖腥悶、鍾意挑剔，一個好難搞嘅星座，但我哋覺得處女座係幾能幹，唔會太依靠人，所以想利用自己擅長合著一本書，好似處女座之間交換日記。」處女座嘅Mandy有冇試過被討厭？佢笑說：「我老公話好驚處女座，但佢前女友都係處女座，所以討厭係一件事，夾唔夾係一件事，好多嘢係命運驅使。我都好憎魔蠍座，但我哋係夫妻，知道對方乞人憎嘅地方，反而可以諒解。」今次出書，Mandy更唔揀大出版社：「好開心同香港獨立出版社合作，我想有自由度自主權，宣傳費全部慳返落嚟，投放喺本書嘅資源上面。」
Mandy坦言未夠料以攝影會友，但覺得影相有種使命感，在乎張相帶嚟乜嘢訊息。訪問當日，Mandy應《蘋果》邀請走上街頭，用相機拍下佢眼中現今嘅香港：人來人往嘅鬧市、踩單車送外賣嘅打工仔、兼賣電話卡嘅報紙檔：「以前佐敦有畫廊，行業未式微之前，爸爸喺屋企畫畫養大我哋兩姐妹，每月搬一大卷畫交去佐敦，阿爸攞到錢都會話：『今日全家出去食餐好。』因為平時死慳死抵，每次出佐敦意味可能有鐵板餐，自細知道佐敦係養活我哋嘅地方，有種情意結。」
離開香港9年嘅Mandy，每次返嚟都好懷念，但熟悉中有少少陌生：「當初離開時，香港仲係稱為安居樂業嘅地方，但呢9年，大家面對嘅問題，我都錯過咗，好多人話點解你咁醒目㗎？但我當初離開，純粹想搵一個地方重新開始，每次返嚟同香港朋友傾偈，佢哋普遍情緒比較低落，但香港人喺我心目中係好堅強識變通，可以諗到好多方法生存落去，逆境自強。」
