近年長駐大陸發展嘅「啫神」徐錦江，佢拍戲重質不重量，反而投放大量時間搞藝術，師承已故嶺南畫派國畫大師關山月嘅佢，早年已轉營當畫家同雕塑家，徐錦江嘅藝術作品有價有市。日前《蘋果》就喺旺角捕獲到佢同老婆殷祝平、囝囝徐菲濕平大出血！


徐錦江幾年前喺安徽蚌埠市龍子湖旁邊籌備藝術園，據知藝術園投資額高達60億人民幣，園中有錦江藝術中心、螞蟻咖啡館及錦江藝術酒店三個項目，徐錦江個人總投資約5千萬人民幣，將於今年中開幕。


正當藝術園籌備得如火如荼之際，徐錦江日前就同老婆殷祝平偷得浮生半閒，帶埋囝囝徐菲返港探親，返到嚟呢個購物天堂，梗係要去濕平。佢哋呢個三口之家，除咗幸福滿瀉，最特別係全家都剷咗平頭裝。想當年徐錦江因為拍古裝扮大俠要剃光頭，徐太以行動支持，結果囝囝自細也係光頭仔，至今不變。返到香港，徐錦江一家三口就選擇咗住喺旺角，佢哋趁空檔去咗旺角新世紀廣場行街，徐太雖然生得細粒，但有高大老公徐錦江同囝囝傍實，份外突出，18歲嘅囝囝徐菲已身高6呎，媽咪撓住小鮮肉囝囝臂彎，感覺好溫馨。


農曆新年將至，好多品牌都大減價，徐錦江佢哋就入咗一間大型連鎖店，一家三口就分頭睇心頭好，最後囝囝大有收穫，又買新外套，又買新波鞋，媽咪就當然負責畀錢埋單啦！正當佢哋準備步出舖頭後，即有影迷上前拉住徐錦江夫婦合照留念，跟住佢哋就轉戰下一層去買化妝品，見到徐太對唇膏情有獨鍾，喺貨架前好細心咁揀顏色，徐錦江就好細心咁等候，非常體貼。


事後《蘋果》致電徐太，佢話：「帶Figo（徐菲）嚟香港玩幾日，佢鍾意港式飲茶，嗰日我哋啱啱飲完茶，就行吓商場。」有指徐菲備受電影公司睇中力邀拍戲，徐太話：「暑假時有畀佢拍過，佢好有興趣，但我哋o依家主要想佢讀好書先。」天氣轉冷，問到徐太可考慮留番長頭髮，佢話：「習慣咗短髮，好方便打理，我哋一家都同一個髮型，佢哋父子都係我嚟剪，我就自己剪，節省咗唔少理髮錢，又用少啲洗頭水，好環保。」　




探訪、攝影：黃曉程、羅德光徐錦江日前一家三口返港探親。一家三口去咗旺角血併。
兩父子有商有量。擁有六尺身高嘅徐菲，成個模特兒。
徐錦江仲幫老婆襯衫。徐錦江同囝囝感情要好。(微博圖片)徐錦江同老婆長駐大陸搞藝術園。(微博圖片)
徐錦江老婆殷祝平(微博圖片)