欣宜今日嚟到《今日ENT》，一向都有好多人喺網上批評佢，佢喺節目入面話已經睇化咗，佢又話曾經為咗呢啲comment而去活，好想令到自己冇咁乞人憎，佢話呢啲留言都係佢嘅consumer，所以一定要知道佢哋鍾意自己啲咩，所以今日就安排咗一啲網民稱讚/批評佢嘅留言，睇下欣宜點回應啦！
網友：認識欣宜的歌聲是從《甜言蜜語》的主題曲《直覺》，高音一直咁好聽，加油！
欣宜：多謝你呀！《甜言蜜語》係我第一首非兒歌，你留意到我好開心，我記得係08年出嘅，好耐冇唱，concert嗰時唱吓。
網友：其實欣宜啲戲OK吖，sosad，講真幾好戲，good。
欣宜：我係好開心嘅，因為今時今日我都覺得自己啲戲好屎㗎，哈哈！好多謝你識欣賞，對演戲我唔多經驗亦唔多考究，只係上過一堂，但自己接到乜嘢角色，盡量忘記自己係邊個去做，如果大家覺得good，我好開心。
網友：細細個已經成日上鏡上電視，擺明係發明星夢發到癲嗰類人！
欣宜：係呀，我真係㗎，哈哈哈，我有問題㗎，因為我係獨女，婆婆湊大我，細個得我同婆婆喺屋，所以佢好保護我到爆炸，記得細個我想出去踩單車，但婆婆唔畀，驚我畀人枴咗，變得成日一個人喺屋企，成日對住塊鏡，鏡子入面自己就係最好朋友，成日鍾意模仿、朗誦、唱歌、跳舞、一字馬，就係自己同自己對住鏡玩。記得以前攞起故事書，一個人飾演晒咁多角色，越多人睇住越想表演。《29+1》入圍最佳女配角好意外，從來唔覺自己屬於電影世界嘅人，係音樂世界借咗我去嗰邊，我覺得能夠獲提名，話畀我知好導演同好劇本幾咁重要，多謝彭秀慧導演，希望佢得獎。
網友：天生靚聲，但唱腔略嫌造作！
欣宜：都有好多人咁講，尤其是話我哭腔重，呢樣嘢我曾經好困擾，點解哭腔咁重，舊年唱《你是甚麼時候開始不愛我的》，我嘗試無哭腔，大家覺得我唱得難聽，所以我覺得應該攞平衡點，因為唱緊sad歌。大家留意我新年後推出新歌《鄭家詠》，應該冇哭腔。
網友：欣宜其實皮膚唔差，五官又OK。
欣宜：我好勤力護膚，因為我10幾歲係滿面暗瘡，火山爆發嗰種好核突，記得我娘親曾經同我講一句對白，令到我好hurt：「都唔知點解你會生暗瘡，我都唔知乜叫暗瘡！」佢真係好白滑靚到爆炸，平時真係唔搽粉，就咁紅唇膏搞掂，所以我依家好努力護膚。
網友：音色太普通啦，把聲又冇乜味道，哭腔又重，唱到好似苦情歌咁！
欣宜：你要講埋係乜歌，我先會有進步，其實呢種回應我一啲都唔傷心，因為我好需要聽到真說話，好了解自己唔係天使聽音，但我想可以帶到訊息喺歌曲，4月開騷希望觀眾覺得娛樂性好高睇得開心，曾經試過扮下靚聲，但扮唔到，但學唱歌練聲係需要嘅。我由10幾歲已經喺被鬧嘅聲音中成長，初時梗係好唔鍾意，你梗係唔了解我，但你要笑我，起碼我娛樂到你，能夠帶到人歡樂。
網友：唔係因為佢身型而反感，而係佢啲行為好造作好假，見到欣宜，諗起五個字「好假的肥仔」！
欣宜：哈哈哈！多謝叫我肥仔，OK，（自摸胸、鼻、口、面）真嘅真嘅真嘅，雙下巴都係真嘅，我邊忽係假啫，儍豬嚟嘅。
網友：《29+1》個個都話有欣宜唔入場，咁畀個alternative 又無，我就覺得cast得好好，個角色係要造作得嚟唔太靚女，如果係靚女好易搶娜姐鏡，欣宜未必係最好，但又邊個女演員可以？
欣宜：其實我拍嘅時候都好擔心，導演不斷叫我開心啲，我都諗，死啦，會唔會太可愛，但我睇咗導演剪完片，就明白導演點解咁做，因為角色要對比。
網友：欣宜畀人感覺好似大唔透，永遠要特別關照咁。
欣宜：係呀，我承認㗎，我諗好多人都想被人關照，我覺得呢樣冇錯，但話大唔透，我覺得都係幾好事情，我都想80歲時有18歲心態。
網友：自己咁有錢，何苦入娛圈！
欣宜：其實我真係冇乜錢，有嗰個已故嘞！我成日搭的士嘅時候，的士司機都會話：你都要搭的士，你冇司機咩！我心諗請一個司機好貴，同埋我冇車，我行街永遠有人認得，但搭地鐵永遠冇人認得，即係話畀我知冇任何一個人覺得鄭欣宜會搭地鐵囉。
欣宜又喺節目入面唱咗《Fake a smile》及《你是什麼時候開始不愛我的？》，佢話要知道大家鍾意乜唔鍾意乜先會做得好。所以希望大家再留意佢嘅動向，希望可以留意到佢躒4月21、22日會有紅館騷。
 攝影：沈健程 |  欣宜話一直都有好多批評佢，曾經為過唔好咁乞人憎改變自己。 |  抽到讚嘅留言，佢表現得好好好開心。 |
 |  |
