因為16年大陸實施限韓令，搞到唔少韓國藝人轉向香港同澳門等等其他地區搵錢，佢哋除咗出席商業活動之外，唔少藝人搞演唱會、簽唱會同fans meeting等等活動，門票票價通常都超過1,000元以上，不過fans一啲都唔手軟，有幾多買幾多！
喺僧多粥少嘅情況吓，香港嘅藝人如果真係想賺外快，唯有係去其他地方登台做吓騷，一來可以同其他地方啲fans見吓面，二來又可以增加吓收入，真係一舉兩得。好似視帝陳展鵬，佢今日喺ig貼咗張海報，原來喺大年初二、即係17號，佢會去吉隆坡搞個fans meeeting，仲同啲fans約定話不見不散！
偶像同fans嘅聚會係好平常嘅事，就算設有門票亦屬正常，但係唔知係咪人離鄉貴，坐吓飛機出埠做嘢，身價都係唔同啲，今次視帝陳呢個聚會，設有三種票價，最貴係馬幣588(約港幣$1,170)、其次係388(約港幣$770)同最平係188(約港幣$374)，poster仲講明，可以同陳展鵬近距離接觸！
睇番啲資料，呢個fans meeting嘅門票，認真可以媲美啲一級歌手，好似BIGBANG成員之一嘅G-DRAGON，舊年喺大馬開騷，除咗VIP嘅門票要馬幣710(約港幣1,400)左右之外，其他門票都只係馬幣590(約港幣$1,170)。
五月天嘅情況亦都係一樣，VIP嘅門票係馬幣698(約港幣$1,385)，其他嘅門票都係馬幣668(約港幣$1,326)起。就算今年4月喺大馬開騷嘅側田，VIP嘅票價亦都係馬幣608(約港幣$1,200)，係咪係值回票價，真係因人而異，但係唔少人都好好奇，唔知今次陳展鵬又會做啲乜嘢表演呢？會唔會又表演吊起打鼓呢？
 |  陳展鵬喺ig同fans約定！(ig截圖) |  陳展鵬嘅fans meeting排得住G-DRAGON演唱會嘅門票。(網上圖片) |
 (網上圖片) |  (網上圖片) |  陳展鵬嘅身價已經同一線歌手睇齊？ |
