賭王何鴻燊三房靚靚千金超蓮呢幾日原來去咗台灣，噚晚仲俾台灣《蘋果日報》就見到佢着住運動裝，柺下柺下咁去到台北一間老字號牛肉麵店，同個朋友一齊好仔細咁研究間食肆嘅內外裝修，坐低咗又好研究餐牌，仔細到一個點……係要睇埋商品目錄、清單等等，甚至未有點單就已經有得試食，之後超蓮就返咗附近酒店休息。


嗱嗱嗱…唔係因為賭王千金有免費優惠，超蓮係想創業呀！佢接受台灣《蘋果日報》訪問時話，佢同牛肉麵店第三代女老闆係好朋友，已經傾好該店嘅海外代理權，遲啲會喺香港同澳門開分店，超蓮話香港食到嘅牛肉味少咗陣「台灣味」，開業初期睇請台灣師傅幫手睇場。牛肉麵店上一代老闆娘就透露，呢次合作事宜已經傾咗兩年幾，賭王派過同事去考察，連三太陳婉珍都有親身去過試食。


其實超蓮都有喺ig透露咗事業心，佢噚日都有話做咗一陣櫃檯，又坐喺收銀櫃拍咗條片影住女老闆朋友收工清潔廚房，仲tag住話係「辛勞的男友」，遲下可能有得食超蓮愛心大餐添呀。