鄺美雲(Cally)、吳卓羲、關楚耀、JW、羅霖同江美儀等，今日各自帶埋自己嘅寶貝寵物到會展出席動物醫生活動，其中Cally嘅兩隻寶貝狗Euro同Bank本身已經係動物醫生，所以Cally話今日特登帶佢哋嚟出席活動見下朋友仔。
嚟緊狗年會唔會多咗唔同嘅機構邀請Euro同Bank？Cally表示：「一直都有唔同嘅單位邀請，新年就會帶佢哋兩個去老人院做探訪。」去年年尾推出發燒碟後，Cally表示銷售成績好好，已經突破一萬張，佢話：「唱片公司話要同我慶功，其實自己都有啲唔好意思，因為工作好忙都冇時間做太多宣傳。」
而最近為拍電影電視劇中港兩邊走嘅吳卓羲，亦都有現身活動，佢話自己屋企領養咗一對貓：「係從貓義工身上收養返嚟，對貓仔o依家一歲幾，好百厭，成日喺屋企跳嚟跳去，掃跌晒我啲嘢。」
另外，關楚耀同JW都分別帶埋寵物狗現身，關楚耀嘅狗狗係五歲嘅貴婦狗CoCo，而JW嘅係十個月大嘅西施狗Cassi，其中JW仲透露原來Cassi係男友所送贈：「我哋全家都好鍾意Cassi。」咁會唔會鍾意狗狗仲多過男友？佢話：「又唔可以咁比較。」
 鄺美雲(Cally)、吳卓羲、關楚耀、JW、羅霖同江美儀等，今日各自帶埋自己嘅寶貝寵物到會展出席動物醫生活動。 |  其中Cally嘅兩隻寶貝狗Euro同Bank本身已經係動物醫生。 |  去年年尾推出發燒碟後，Cally表示銷售成績好好，已經突破一萬張。 |
 而最近為拍電影電視劇中港兩邊走嘅吳卓羲，亦都有現身活動。 |  關楚耀同JW都分別帶埋寵物狗現身。 |
