張學友日前到美國康乃狄克州站嘅金神體育館舉行3場巡唱，2月4日尾場仲同美國大型體育賽事美式足球「超級碗」打對台，學友騷全場2萬飛照樣被秒殺，場館嘅當地工作人員都好驚訝話：「Jacky Cheung呢個名已經環繞大家耳邊幾個月！」呢3場觀眾分別由紐約、芝加哥、波士頓、華盛頓等地到康州朝聖，有網友話揸咗6粒鐘車去睇騷。
學友喺台上又唱又跳仲做埋一字馬，問觀眾：「邊個係第一次嚟睇我嘅演唱會？」點知有半場人舉手，學友搞笑話：「突然覺得有啲失敗，我唱咗34年，你哋先第一次嚟睇騷，不過我都好開心一直有新朋友嚟。我今年56歲，仲勉強可以跳舞，如果當我60歲跳唔郁時，但仲想唱歌畀大家聽，我都會繼續唱。」
而金神體育館過往有多位神級歌手開騷，場館後台嘅「名人牆」就有Bon Jovi、Cyndi Lauper、Def Leppard、Lady Gaga、Shania Twain、KISS等簽名，場館人員睇完學友騷後，力邀香港歌神喺牆上留名，學友成為受邀簽名嘅華人歌手。
 學友巡唱美國康州站，有日同超級碗撞期，照樣秒殺2萬張演唱會飛。 |  |  |
 當地工作人員都好驚訝，仲邀請佢喺名人牆上簽名。 |  |  |
