黃子華、佘詩曼同蕭定一今日坐住直升機去到石崗直升機場，為電影《棟篤特工》做宣傳，三人都盛裝打扮喺直升機面前擺晒pose影相，坐住直升機嚟嘅佢哋接受訪問時，子華表示：「沿途留意到香港好多綠色植物，風景好靚，諗唔到石屎森林原來有咁多花草樹木，真係要好好保護。」
問到子華電影入面有冇坐直升機？佢話：「電影冇，海報就有，頭先喺直升機內同行嘅人全部都唔遵守指示開晒電話，我好守秩序嘅，因為我係特工，但佢哋就係咁玩電話，好似想叫埋外賣咁。」
嚟緊農曆年期間，子華同阿佘都表示要為電影宣傳，問到係咪會開續集？子華話：「咁就要睇下大家嘅反應啦。」問到佘詩曼情人節有咩節目？佢話：「情人節都要開工幫電影做宣傳。」咁咪要黐住子華囉？子華話：「情人節我要做節，唔得閒陪你，我都希望有機會靜雞雞入場睇下觀眾嘅反應，我以前會喬裝入場，不過嗰個喬裝好突出，有好大Pat鬚同哨牙反而仲突出，所以今年要再諗過究竟用啲咩打扮入場，咁就可以真正見到觀眾嘅反應。」
至於電影嘅老闆蕭定一受訪時亦都話對票房都有信心，佢話：「預售嘅成績幾好，中文片嚟講好少有預售，但o依家見到年初一初二嘅銷售情況真係唔錯。」蕭定一透露，電影的確希望開拍續集，佢話：「占士邦都可以拍到咁多集啦。」
問到今次係咪特登安排上天下海氹子華開心 ？佢話：「子華係占士邦，占士邦就搭地鐵就唔有型啦，一定要坐下呢啲交通工具。」
 攝影：陳俊強 |  黃子華、佘詩曼同蕭定一今日坐住直升機去到石崗直升機場為電影《棟篤特工》做宣傳。 |  |
 |  三人都盛裝打扮喺直升機面前擺晒pose影相。 |  |
