劉嘉玲、任達華、衛詩雅、麥明詩、王菀之、楊受城同謝賢等，今晚喺灣仔出席電影《我的情敵女婿》首映禮，安德尊扮財神到場，今日大家都着到好有意頭，而麥明詩父母都有嚟捧場，不過着住低胸吊帶裙嘅麥明詩唔小心露咗胸墊，認真失威。嘉玲就着住紅噹長皮褸，入面襯紅裙低胸裝火辣辣到場，華哥就牛仔裝，件牛仔褸鑲滿金雀。
而着住綠色吊帶低胸背心嘅唐詩詠，被問到有咩朋友嚟捧場？佢話：「TVB同事同樂小姐(樂易玲)。」冇叫洪永城捧場咩？佢再話：「應該冇喇！唔係我叫嘅。」會唔會私下叫埋洪永城睇？詩詠好直咁話：「唔會，但我會叫佢自己買多幾張飛睇。」問到點解唔一齊睇？佢避忌咁話：「唔啦，叫佢自己買多幾次飛睇囉！」詩詠又講到新年要開工拍新劇，因為做醫生角色，呢排都要練習手勢同術語。問到情人節慶祝節目，佢話：「睇完戲已經過晒，同大家一齊過，最開心見到嘉玲姐，部戲得一場同嘉玲姐同場，導演呃我話好多戲份同華哥、嘉玲姐對手，但最後得一場。」見佢宣傳海報拎住張寫住「小三遠離」嘅揮春，唔知係咪詩詠嘅新年願望？詩詠踢爆：「影嗰時冇㗎，可能佢哋賜畀我嘅。」
另外，王菀之話首映加情人節雙喜臨門，所以著着得繽紛啲。問佢有冇送禮物比老公，佢就話好少情人節準備禮物，係暗地裏嘅默契。
 （攝影：陳俊強） |  劉嘉玲、任達華今晚喺灣仔出席電影《我的情敵女婿》首映禮。 |  麥明詩都有嚟捧場。 |
 麥明詩不慎露胸墊 |  楊受城同謝賢等亦有出席。 |  衛詩雅 |
 着住綠色吊帶低胸背心嘅唐詩詠被問到冇叫洪永城捧場咩？佢話：「唔係我叫嘅。」 |  王菀之話首映加情人節雙喜臨門，所以着得繽紛啲。 |
