孫慧雪今晚喺銅鑼灣Sogo門外街頭出席「NBA香港嘉年華2018」活動，一身運動look，bra top襯NBA外套，吸引好多市民圍觀影相及自拍，雪雪負責派紀念品，一男一女fans仲獲得簽名NBA籃球。雪雪話：「老公係NBA迷，平時被逼陪佢睇籃球賽，我鍾意火箭同速龍，我今日呢身裝扮都係老公幫我揀。」平時睇波係咪點睇靚仔？雪雪笑話：「我最鍾意睇人受傷，好轟烈，又熱血。」
雪雪話老公平日都有打籃球，佢仲又自誇係廿四孝老婆，會到場為老公打氣。講到今日係情人節，佢話陪唔到老公過：「今晚去睇首映，老公怕醜唔去，下午想一齊去食飯又多人，年初四會陪佢去睇NBA明星賽補數。老公送咗3對家庭裝籃球鞋畀我哋一家三口，佢派我今日嚟拎NBA紀念品，佢就喺屋企湊仔兼負責入利是。」
雪雪仲話今年預咗五位數封利是：「好彩有個仔可以幫手逗利是，雖然得6個月大，太細唔識講，但我有教佢雙手接利是，今日出門口時個仔識叫我媽媽，好開心！」
 攝影：陳俊強 |  孫慧雪今晚喺銅鑼灣Sogo門外街頭出席「NBA香港嘉年華2018」活動。 |  |
