今日年三十，中國人傳統一家團年，寓意一家人平安團圓。童愛玲同囝囝王子毅今日現身機場，原來童愛玲出發返娘家過年，佢話：「返台灣過年，屋企人全部喺嗰邊，初五返，嚟咗香港24年，未miss過一次，每一年都返去過年。」
上周二花蓮7級大地震，童愛玲感到難過，提到新年願望，佢話：「希望身體健康，台灣平平安安，每年過年都有唔好嘅事發生，希望香港同台灣一齊平安。」童愛玲娘家喺台北，佢話自細都習慣地震，問到怕唔怕有餘震？佢話：「我喺台灣長大，都習慣，細細個食食吓飯都會震，有時南部有好大嘅地震，台北就好彩啲，前年同囝囝去花蓮天長行山，但係啲人話嗰度已經行唔到，因為當地年年都有地震。」
