黎小田(Michael)一連兩場嘅《小田金曲50年作品演唱會》噚晚喺紅館順利完成尾場，嘉賓陣容依然非常鼎盛，湯寶如、陳曉東、胡渭康、林利、小肥、柳影虹同吳浩康外，仲有周華健、陳美齡同布志綸等，本來仲有許志安擔任嘉賓，可惜安仔因染上乙型流感而缺席，Michael喺開騷前喺台上就安仔未能現身而向觀眾致歉。


頭場邀請到薛家燕擔任嘉賓，仲同Michael喺台上不停打情罵俏，噚晚呢個緋聞都仍然成為大家嘅話題，胡渭康喺台上就問Michael：「我睇報紙話你同家燕姐撻著咗，你當年結婚嘅時候我有嚟飲，依家係咪可以飲多一次？」Michael就答：「你快啲唱歌啦。」


湯寶如出場就更加進取，佢揀咗前一晚家燕姐演繹嘅《心肝寶貝》，唱之前仲先問Michael：「呢首係你同家燕姐嘅訂情歌，我可唔可以唱？」唱到中段又話同要用家燕姐嘅唱腔嚟唱，仲同Michael表示：「祝你同家燕姐心心相印，連生貴子。」引得觀眾笑聲不斷，Michael話：「人哋6月都娶新抱。」湯記就話：「好易啫，呢頭娶完新抱嗰頭即刻換婚紗咪得囉。」


Michael再話：「家燕已經有三個(仔女)啦喎。」湯記話：「三個都大個啦，你哋即刻多個都得㗎，家燕姐一定生到。」Michael無咁好氣話：「你再咁樣我話畀家燕姐聽 。」湯記繼續唔放過佢：「講囉，你WhatsApp佢囉。」Michael終於投降：「咁你想點啫？」湯記話：「錫我一啖啦。」Michael唯有照做。




攝影：沈健程、馮嘉銘湯記祝小田同家燕連生貴子。