韓國45歲型男張東健出道26年，曾拍攝電影《太極旗飄揚》、劇集《紳士的品格》等多部人氣作品，日前佢演出節目時，就坦言當初係因為生計問題而入行。
於節目《Section TV演藝通信》中，被問到踏入演藝圈嘅原因時，張東健表示：「1992年，我於MBC電視台出道，當時想當演員係因為生計問題。我當時已經係考咗兩次大學都落榜嘅學生，正準備大學考試，但因為唔想增加父母嘅經濟負擔，我就做臨時演員賺學費，當時我聽講當正式演員嘅話，拍廣告、演出費都會有提升，因此我就參加演員考試。」
而張東健近日就忙於跟《大力女子都奉順》男星朴炯植拍攝KBS新劇《金裝律師》，新劇將於下月25日播出，劇組噚日公開二人嘅新造型照。劇中張東健飾演於有名律師事務所中工作嘅傳說級律師，朴炯植就飾演擁有超級記憶力嘅律師新人。
