杜汶澤前日喺第13屆大阪亞洲電影節獲頒嘅「亞洲明星大獎」(Asia Star Award)，表揚佢喺電影有傑出表現，隆重其事仲帶埋老婆田蕊妮赴會，點知田蕊妮跣手，個獎就碎開兩截……阿澤自我安慰「第日有機會再攞過啦！」同時又補多句「我頂你個肺。」（新聞連結：http://bit.ly/2IA7Mw7
）
阿田今日同陳凱琳、李施嬅、鄭善強、樂易玲等一齊出席活動，佢講番跌爛老公個獎一刻，真係非常震驚，事後覺得非常內疚，想即刻請番老公食餐和頭酒，又諗過叫大會重新造番個獎座。阿田話阿澤想留住呢道裂痕，所以將個爛咗嘅獎座帶番屋企，再放入盒中保存。
陳凱琳就話試過幫男友鄭嘉穎走留喺公司嘅嘢，曾發現有啲獎項擺得太耐部份有損毀，包括喺新加坡獲得嘅視帝獎項，仲試過幫手黐番好。
