楊千嬅今晚喺新加坡出席意大利皮具品牌Tod's當地旗艦店重新裝修後活動，佢話上星期先去過新加坡，加上老公丁子高因為喺香港有活動，同埋帶咗個仔去泰國玩，所以今次自己單拖赴獅城，但佢做過個活動都會過泰國會合老公同個仔，玩番幾日。
千嬅仲提到下個月會為新劇《多功能老婆》開工，有傳佢喺呢套劇搶咗鄧萃雯個角色，千嬅話：「吓！我唔知喎，我覺得呢件事嘅可信性好低，因為全香港嘅人都知我最緊張我嘅家庭，如果唔係有人邀請，暑假我都寧願攞嚟湊仔。事實上丁生同寶華姐（編劇陳寶華）係好熟嘅，而我媽咪同雯女都係比較熟嘅，總之我屋企人同雯女嗰邊係世交，我哋兩家人係會一齊食飯，席間其實有傾開話拍劇，以我所知佢收集嘅題材應該唔係呢套，係講一啲關於教育嘅嘢，好彩大家係識嘅，否則會好尷尬，可能呢啲大家唔知啦，不過永遠有啲真相都係冇人知嘅。」而千嬅亦話自己好期待今次嘅角色，因為同以往好唔同。
問到佢算唔算多功能老婆？千嬅話：「o依家嘅女生比較multitasking，無論係做女定做太太，都有好多嘢要兼顧，知道女性多男性少，所以我哋都要肩負番起啲社會責任。」問到套劇嘅籌備進度，千嬅透露：「同寶華姐有見面，自己都想多啲了解呢個故事嘅人，o依家就慢慢睇好劇本先，係喺一個輕鬆之下嘅氣氛拍攝嘅。」
千嬅不時要出埠公幹或拍劇，問佢會掛住老公定仔多啲，千嬅諗咗一陣之後答：「適當嘅時候想念適當嘅人，（驚唔驚拍劇時個仔唔捨得？）個仔o依家讀year 2，學校都比較多活動，不過我哋都幫佢啲時間安排得好好，總之爸爸收工就會陪到佢，同埋佢明白媽咪係會有工作做，所以都OK。」
精
 （盧妹、陳慧安新加坡直擊） |  千嬅今日單拖現身皮具品牌Tod\'s新加坡當地旗艦店重新裝修後活動 |  佢話下個月就拍劇 |
 對於搶角色傳聞，千嬅話可信性低 |  |  |
