《第37屆香港電影金像獎頒獎典禮》前晚圓滿結束，本港九大電影公司齊集舉行慶功宴。出爐影帝古天樂、影后毛舜筠、最佳男、女配角得主姜皓文及葉德嫻等先後現身，紛紛被現場人士「集郵」。古天樂甫出場即全場歡呼。問到心情是否已平復？他笑指OK，並稱有留意黃秋生於台上的言論，認為每人只是說出自己的感受，不想作任何評論。
問到得獎後會否加片酬？古天樂稱：「冇諗，留畀經理人講。（點慶祝？）要同太多人慶祝，屋企人都未瞓，遲啲爸爸生日，到時再慶祝。（送個獎畀爸爸做禮物？）係呀。（下個目標係咩？）每一刻想做嘅嘢都唔同，依家想返屋企瞓覺。」問到是否心情鬆一口氣？他直言不負眾望，要感謝很多朋友。
女兒帶來幸運
至於佩戴七百萬港元Tiffany & Co.鑽飾上台領獎的毛毛明艷照人，她笑言擔心心臟跳得太快而死亡，又指同行女兒為她帶來幸運：「我係藍帶廚師，先去五日旅行，然後留喺屋企七日七夜，煮番餐畀投我一票嘅人。（遲來的獎項？）唔會，神畀呢個獎我係最啱時候。（攞獎有冇話畀老公知？）未得閒睇手機，應該有人同佢講，佢會戥我開心。攞到呢個獎好圓滿，作為演員辛苦咗幾十年。早幾年得過女配角，依家女主角，真係好滿足。其實凌文龍得獎嗰陣我已經好激動，都覺得自己有冇獎唔緊要，但佢同我講叫我一定要拎到。」
|
|
失落影后的周秀娜，不忘向前輩毛毛道賀：「每一個提名演員都係用自己努力換來大家認可，毛舜筠用實力贏咗影后，她是我未來努力同學習的目標。」
