30歲失婚裕美同老外男友Alex打得火熱，早前兩人喺餐廳公然耳鬢廝磨，愛火同慾火都燒到澎澎聲，兩人經常出雙入對做脆麻花，但日前裕美就撇甩男友，單拖現身銅鑼灣行日本城買垃圾桶，似乎搬咗新屋要添置日用品。


雖然男友家住半山豪宅，但裕美卻抽住垃圾桶行足5分鐘返唐樓寓所，原來仍未能獲賜進駐有米男友豪宅做女主人。


當日下晝5點幾，化行妝嘅裕美着黑白連身裙踢拖，孭住一個大背囊現身銅鑼灣，急急腳行去銀行櫃員機撳錢，然後到日本城執平貨，雖然識咗一個有米男友，人人都以為裕美有男友照住，但原來佢依然好慳家，見佢主要睇細小嘅日用品，又問店員擺放位置，佢揀咗大約15分鐘，最後買咗一個灰色垃圾桶同日用品離去。


一手抽住垃圾桶嘅裕美，並沒有選擇搭的士返歸，而是攞住垃圾桶招搖過市，行咗差唔多5分鐘才返抵位於禮頓山黃泥涌道嘅唐樓寓所，似係搬入新居不久，幾乎差啲行錯大廈門口，最後自己用鎖匙開鐵閘上樓。估唔到裕美同老外男友咁煙韌，依然各有各住冇玩同居試婚。裕美住嗰度，間格大多係兩房一廳，350呎租$17,000左右。


兩年前裕美同前夫離婚，又與舊愛黃子恒分手，但裙下之臣未停過，新歡老外Alex係英意混血兒，唔單止生得靚仔，家住半山豪宅，兩人經常喺網上放閃，甜蜜爆燈。




採訪、攝影：羅德光裕美早排同混血男友打得火熱，但就單拖買垃圾桶返新居。