樂基兒、刑嘉倩等今晚喺尖沙嘴文化中心出席「MOISELLE Stop The Traffic時裝騷」。邢嘉倩與妹妹，即林青霞所生大女邢愛林亦結伴睇騷，邢嘉倩陀住巨肚，佢話等緊生，但未知性别，希望可以有少少驚。
樂基兒穿上一條黑色裙，大騷長腿，佢話:「係呀，因為諗唔到着乜嘢褲喺裡面，今日好開心for Harris，好興奮。」講到樂基兒近日好勤力美臀做gym，佢話：「都開始做gym train吓。」覺得自己有成績未？佢反問:「唔知呢？你哋覺得呢？不過自己好鍾意瑜伽，希望練番。」
樂基兒話老公冇特別讚佢，自己開心鍾意就得，又話老公都有同佢一齊做瑜伽，對老公身材冇乜要求。介唔介意老公有肚腩？樂基兒話:「我唔會介意嘅，我自己都成日有啦。」怕唔怕整嘢食到老公變肥仔？佢話:「唔會，唔係餐餐都heavy㗎嘛，有時都會做吓exercise，最緊要健康。」鍾唔鍾意摸老公肚腩仔？樂基兒笑話:「佢o依家都冇，不過真係冇乜所謂㗎，最緊要自己鍾意，佢o依家都好滿意，我鍾意佢，唔係因為佢身型嘅。」
 (攝影﹕沈健程、陳慧安/ig圖片) |  樂基兒大騷長腿。 |  |
 邢嘉倩腹大便便，話自己隨時生得。 |  林青霞大女邢愛林(灰衫)，與同父異母姐姐邢嘉倩一齊睇騷。 |
