貝安琪（Ankie）與加拿大籍男友Simon van Damme舊年生咗混血B仔Sebastian，因為Simon熱愛中國功夫，Ankie就幫囝囝改咗一個中國名叫「貝小龍」。兩母子日前就同《蘋果》去清水灣大坳門放紙鳶、踢波玩吹番梘泡親子樂。
15個月大嘅Sebastian擁有媽咪中德血統，加埋爹哋嘅加拿大血統，生得靚仔趣緻，係萌B一名，見到陌生人好好笑容，去到公園就好有好奇心，一時要睇公園嘅狗仔，一時又要攀鐵柱，見到比佢大嘅小男孩就攬埋一齊玩，Ankie笑言有呢個得意仔多咗好多樂趣：「有個仔，要有多啲energy先得，每一日都唔一樣，每一日都好開心，係多啲meaning，有自己個家，同個仔，係唔一樣，最初係無人幫我，係辛苦，瞓得好少。」辛苦以外，Ankie更爆囝囝窩心事，佢最愛喺屋企抹地做家務，每朝起身就甜錫媽咪爹哋。
Sebastian好易融化Ankie，兩母子邊散步邊唱歌仔，甜蜜似情人關係，佢笑言呢個係「you love each other」感覺。Ankie係新手媽咪，笑言都係學習中，小時候覺得媽咪係好嚴，尤其喺紀律方面：「我見到我德國嘅朋友，教得幾好，就係唔好咁緊張，我覺得要calm啲，佢哋唔會好嬲鬧佢哋，打嗰啲。因為我見到香港啲家長好緊張，我有時見到都會驚。每個爸爸媽媽都係自己揀，學習做媽咪最難係有攰時候，佢攰同我攰都難啲，不過都仲係好calm，我啲朋友都問我點解可以咁soft同佢講嘢。因為我覺得自己緊張，個小朋友都會feel到。我唔鍾意drama，我哋覺得最重要係個仔覺得我哋係朋友，樣樣嘢都可以商量，唔想個仔驚我，想佢到時如果有咩事，會好open同我傾。」自言要做calm媽媽嘅Ankie當然會遇到試煉，好似拍攝當日，囝囝因喺小斜路企不穩跌親，佢即緊張肉痛：「係會肉痛，但我唔會大聲係度嗌，我又唔會鬧佢哋，最緊要同佢哋講『冇事，冇事』。」
小朋友教育問題一向係為人父母嘅難題，Ankie就自言唔會做虎媽，o依家都未為囝囝搵學校，不過都有堅持，就希望佢學多幾種語言：「我有問過啲醫生朋友，我自己細個都係，細個已學廣東話、德文同英文，我覺得都係細個你學得快啲，好似一個sponge，吸收得佢快啲，小龍暫時學德文、廣東話、英文同埋法文，o依家佢識講最重要『爸爸』、『媽媽』同『奶嘴』。」另外，Ankie還希望佢有中國人注重家庭嘅觀念：「我哋本身family都係咁，基本好重要嘢，特別日子喺埋一齊，母親節、父親節、聖誕咁，好似有一日，佢去探我公公婆婆嘅墓地，因為Simon攞咗個掃，擦擦啲水，佢又一齊去擦。」
 貝安琪日前帶15個大混血B仔Sebastian去大坳門放紙鳶、踢波玩吹皂泡親子樂。 (攝影：葉君海) |  Sebastian有得玩好興奮。 |  見到攝影哥哥，即好奇去望鏡頭。 |
 |  |  一路行一路唱《BINGO》兒歌。 |
