食一碗等於敷30塊面膜！女人必食滋補養顏神器「桃膠」，私心分享3款好味桃膠糖水食譜～！
講到養顏神器好多人會諗起燕窩、白木耳等，但近來多咗好多人選擇桃膠～桃膠係植物性食物，唔似燕窩有激素又殘忍，亦比雪耳更滋潤，絕對係女人必食的滋補養顏食品，所以有「食一碗桃膠等於敷完30塊面膜」嘅民間講法～！
桃膠又名「桃花淚」，係薔薇科植物桃或山桃等樹皮中分泌出來的樹脂，為一種固體的天然樹脂，天然無毒。桃膠內含有豐富的氨基酸，能促進膠原蛋白被人體吸收，喺中國的古代醫書內都有記載，桃膠可以用來治療血淋和石淋等病症，還有生津止渴，緩解壓力等功效。
桃膠的結晶體呈琥珀色，本身質地堅硬，但經水浸泡後會變透明及變軟。食用桃膠需要提前一日用清水浸泡桃膠，中途要勤換水，最後要將桃膠中的雜質（樹皮）清理乾淨先可以食用。
桃膠可以配搭糖水，亦可用來煲湯或炒菜，既養顏又養胃！不過桃膠唔可以用明火煮太耐，否則會變得溶爛，影響口感啊！
天氣已經稍稍變涼，較為敏感的人會出現喉嚨乾癢、皮膚嘴唇甩皮的情況，呢個時候為自己煮一碗桃膠糖水就最好不過！以下係編輯私心推介嘅桃膠食譜，大家可以參考一下啊！
#1 養顏桃膠燉牛奶
材料：牛奶250毫升、桃膠6粒（提前一晚浸好並清除雜質）、紅棗5粒（已去核）、1朵雪耳（提前一晚浸好）、冰糖2-5小粒
做法：將桃膠、紅棗放入小鍋中，再倒入半鍋水以小火煮20分鐘，放入雪耳及冰糖再以小火煮15分鐘、最後倒入牛奶煮滾即可。
#2 百合蓮子桃膠羹
材料：百合6瓣（預先浸泡2小時）、蓮子6粒（已去芯）、桃膠6粒（提前一晚浸好並清除雜質）、冰糖2-5小粒
做法：將百合、蓮子、桃膠放在小鍋中，再倒入半鍋水（水量剛好能覆蓋食材）以小火煮30分鐘，放入冰糖再煮10分鐘即可。
#3 蘋果枸杞桃膠糖水
材料：桃膠6粒（提前一晚浸好並清除雜質）、蘋果1個（去皮去芯切塊）、柯杞1小把、冰糖2-5小粒
做法：將桃膠及柯杞放在小鍋中，再倒入半鍋水以小火煮20分鐘，放入蘋果及冰糖再煮10分鐘即成。
