大埔定慧寺兩年前被揭發懷疑帳目混亂，當時任定慧寺住持的釋智定，被身兼該寺董事的翁靜晶踢爆先後和兩名內地和尚結婚。翁靜晶為了定慧寺的法律訴訟，不惜耗費積蓄，更重操故業重返律師行搵真銀。她曾接受《蘋果》說：「我覺得，成件事，都係因我而起，呢件事我一定要去一力承擔。」又稱：「你諗下，如果我依家行咗去，之後會發生咩事？」（新聞連結：　http://bit.ly/2gW2pL4）

定慧寺之前進行斜坡維修工程，但拖欠工程費，翁靜晶替寺院支付220萬費用，但對方一直沒有還款，翁今年九月入稟高院申請定慧寺清盤。昨日有報道指，律政司司長決定介入事件。

今早九時十分，翁靜晶由男友何彪陪同下抵達金鐘高等法院，翁向傳媒謂：「早晨！」又承認為此事十分擔心，之後就與何彪入內。今次屬閉門聆訊，十時完結，之後翁靜晶與律師團隊在法院內繼續商議，至十一時才離開。

翁靜晶由兩名律師陪同下，現身接受傳媒訪問，見其神態明顯比甫抵達時輕鬆不少，有點笑容。

翁靜晶稱：「我哋唔可以公佈太多，只可以講11月27號再聆訊。因為今日係閉門審訊，所以我哋唔可以講太多。我喺度好多謝今次義務幫手嘅團隊，又專業又唔收費嘅專業團隊，多謝晒大家。」

「今日係講臨時清盤人嘅事，今日嘅聆訊，我哋覺得一切都好正面嘅，一切都好正面，但具體講咗啲乜嘢就唔可以透露。」問及律政司是否介入？翁稱：「係！我哋覺得香港嘅司法，同我哋嘅政府，我哋都要擺多啲信任落去啦。我相信社會始終有公義。我好多謝我哋仲有啲正義朋友，專業人士，佢哋出錢出力，好多謝佢哋。到呢一分鐘我仲係相信政府，亦都相信法庭，27號再睇下點。」

翁靜晶表示不能透露有關案件進展及詳情，只謂今次屬一個「公益嘅訴訟」，不是為個人利益，她說：「我都好希望大家可以支持，亦希望大家唔好因為呢件事而對佛教信仰打折扣。我希望大家對信仰更堅定，因為呢啲事嘅發生，可能係令到我哋更加面對我哋嘅信仰係點呢？可以正面啲睇，所有事嘅發生，都一定有個原因。」


左圖攝影：陳俊強