喬妹深夜晒友情照 吳宇森送龍鳳鈪賀雙宋？

2017-11-10

韓國神劇《太陽的後裔》嘅宋仲基、宋慧喬，上周二喺首爾舉行世紀婚禮，一對新人嘅演藝圈好友都有現身祝賀，而喬妹好友玉珠鉉更喺婚禮上獻唱祝歌，令喬妹感動到喊。

近日正喺西班牙度蜜月嘅喬妹噚晚再度更新Instagram，不過佢今次就係上載與玉珠鉉及另一好友李真當日婚宴上嘅親密合照，喬妹更感觸地寫道：「高中一年級認識嘅我哋，時間真係過得好快，20年友情，謝謝，我愛你。」

另外，多次同喬妹合作嘅髮型師今日凌晨亦喺IG上載與雙宋嘅合照，據知張相係雙宋出發去度蜜月當日，三人喺機場偶遇而影，更由新婚人夫宋仲基揸機自拍，雙宋一臉幸福。

此外，噚日網上有雙宋婚禮當日戴住龍鳳鈪嘅相流出，有網民推測係曾與喬妹合作電影《太平輪》嘅吳宇森導演送畀雙宋嘅結婚禮物，事關中國人鐘意送金畀新人寓意吉祥、喜慶，同時早前亦有指吳宇森導演因宣傳新片未能出席婚禮，已經請太太代為送禮。

	(左起)玉珠鉉、喬妹、李真	雙宋出發度蜜月時，喺機場偶遇好友
有網民推測宇森導演送龍鳳鈪畀雙宋做結婚禮物

喬妹深夜晒友情照吳宇森送龍鳳鈪賀雙宋？