同何雁詩西貢拖狗撐枱腳 鄭俊弘被老闆娘集郵

2017-12-04

憑無綫《星夢傳奇》節目彈起嘅鄭俊弘，今年4月被踼爆背住被未婚妻Beebs暗交巨聲幫嘅何雁詩，事後鄭俊弘承認同beebs已經分手，力撐何雁詩唔係小三，但鄭俊弘因為呢件事形象插水，比公司雪藏咗幾個月，直至今年9月先開始解凍。

雖然鄭俊弘公開同何雁詩拍拖，但唔知何雁詩係咪始終都有避忌，所以佢上個月2號25歲生日同朋友開P狂歡，喺Ig晒大合照時，都專登用心心圖案遮咗男友鄭俊弘個樣。

啱啱慶祝完25歲生日嘅何雁詩，日前被目睹同鄭俊弘喺西貢撐枱腳。讀者錢小姐透過《蘋果》「爆相爆片」報料，話上個月4號下午2點半，喺西貢嘅一間餐廳見到鄭俊弘拖住隻狗同何雁詩食晏，佢哋兩個坐喺餐廳出面座位最入一排位置。錢小姐話：「老闆娘見到鄭俊弘都有搵佢合照，但就冇搵何雁詩，鄭俊弘都好友善同老闆娘影相。」錢小姐話佢兩個坐低之後叫嘢食，唔覺佢哋傾偈交流，反而見到何雁詩不停玩電話，好似好忙咁款。