惠英紅於第十二屆亞洲電影大獎獲頒受「卓越亞洲電影人大獎」，小紅姐今日亦有現身記招，講到今次獲獎佢就話：「好開心，呢個係係咪老人獎嚟？我好後大咋喎，講笑啫！其實我自己覺得好榮幸。」喺台上小紅姐就話自己做得未夠好，其實可以培育多啲後輩新人。
接受訪問時問到佢點慶祝？小紅姐就話：「自己都要工作，可能喺屋企食餐飯。」問到小紅姐由去年到依家係咪攞獎攞到手軟？佢話：「呢個獎比較特別，我覺得自己要繼續努力。」講到培育新人，佢又指：「其實有人叫我開talk，不過去到呢個位置都要諗清楚，因為依家啲人都會開演藝學校，分享自己角色，其實得私下都會同大家傾下，都會考慮點做呢個課程，可以用我個經驗畀大家知道，不過我都要好好諗下個課程先，希望幫到其他演員行少啲。」聽到呢度身邊嘅顏卓靈聽到仲話自己要報名，小紅仲即刻話冇問題，佢又話：「都會有演員問我意見，我都會幫手搵咗方向，唔止新人，舊拍檔都有。唔止人哋問我，我都會問秋生點去做，其實秋生、古天樂都有叫我開班教下後輩。」
以「學生大使」身份到場嘅顏卓靈就話依家喺BU副修電影電視：「其實我同啲學生嘅身份、年齡都好相近，諗嘅嘢都接近，大家傾偈都有團火，可以一齊交流唔會畀人問到口啞啞。」另一位「學生大使」韓國演員李廷鎮被韓傳媒報導指與年輕10年嘅Nine Muses前成員E U Erine拍拖，而佢以不回應感情事為由不接受訪問，只談電影。
另外，《出貓特攻隊》演員茱蒂蒙翠莎容素欣 (Chutimon Chuengcharoensukying)獲提名「最佳新演員」，講到入圍感想，佢就話：「好興奮！知道有份入圍亞洲電影大獎，感覺很特別，很開心有份競逐最佳新演員，期待出席頒獎禮當晚能認識其他電影新人！」
《明月幾時有》入圍「最佳導演」的許鞍華回應《蘋果》就話：「覺得非常榮幸，希望我們四項提名中能有一項得獎。」
 攝影：仇志德 |  惠英紅於第十二屆亞洲電影大獎獲頒受「卓越亞洲電影人大獎」，小紅姐今日亦有現身記招。 |  |
