朱晨麗話同蘇玉華拍戲 要用口打交

2018-01-15

黃浩然、陳凱琳、朱晨麗、劉江同沈卓盈等今日去到鑽石山宣傳大台新劇《平安谷之詭谷傳說》。朱晨麗講到劇中要同好戲之人蘇玉華有好多嗌交戲，但佢表達時就講到一舊舊，朱晨麗話:「一出場都會同阿蘇有啲...即係點講呢...口上面嘅打交囉。即係人哋用手打交，但我哋用語言。」在場記者即刻提佢應該係講「舌戰」，朱晨麗聽到之後都忍唔住笑到彎晒腰。有記者問佢怕唔怕啲人見到佢鬧交個款唔敢追求，朱晨麗就話如果咁樣即係自己演得成功。

陳凱琳就話好開心同劉江、蘇玉華呢班前輩合作，覺得今次自己演技有進步，而佢又話呢部劇會提升大家對女性地位嘅關注㖭。會唔會問吓男友鄭嘉穎意見？佢笑住話：「佢睇咗唔講嘅話，我就會諗係咪真係冇問題，如果佢開始俾意見，我又希望佢唔好講說話。」另外，有傳黃浩然會減產，但佢今日否認，話自己一樣會積極工作。