52歲劉嘉玲一向俾人感覺係女強人，平時除咗拍戲、上大陸節目，仲要打理自己嘅紅酒品牌及時裝生意，以前鍾意蒲同打麻雀，現時注重養生，多咗做運動，又會注意飲食，之前佢同發哥行山後，即愛上郊遊。


今日天氣唔算太熱，佢去咗行山，剛才喺網上貼出影片，片中見佢捉實樹幹喺度吊吊揈，成個大細路咁，唔少網民都笑佢越嚟越調皮，又有網民讚佢皮膚好白，真係好想知佢會點保養，另有網民覺得應該愛護樹木，另有網民建議嘉玲試一下攀岩，覺得嘉玲應該手臂夠力。


嘉玲同偉仔共同生活30幾年，二人都好獨立，嘉玲之後喺大陸專訪講過自己只係喺外面強勢，返到屋企就會自動變番小女人，會聽老公嘅說話，好似嘉玲咁，又有一個愛錫自己嘅老公、又有自己嘅事業，又可以享受生活，不知幾愜意。